Hopp til innhold

Trenarane er prega av alvoret

Førde-trenaren: - Kona mi merkar det på meg!

Knut Erik Folland

ER PREGA: Knut Erik Folland vedgår at seriefinalen i 3. divisjon tek på. - Kona mi merkar at eg er rastlaus og aggressiv, seier Førde-trenaren.

Foto: Oddleif Løset / NRK

Laurdag er det duka for ei svært spennande avslutting på årets 3. divisjon fotball:

Tornado Måløy og Førde ligg à poeng framfor siste serierunde. Og medan Førde skal til erkerival Høyang, reiser nordfjordingane til Sogn for å møte sterke Årdal.

I praksis kan det meste skje i kampen om sigeren i avdelinga og retten til å spele kvalik til neste års 2. divisjon.

Er rastlaus og aggressiv

- Det er så spennande, at kona mi merkar det på meg. Eg er rastlaus, aggressiv og uroleg, humrar Førde-trenar Knut Erik Folland.

- Eg kjenner meg igjen i den. Tankane rundt helga kvernar rundt i hovudet heile tida. Det er godt eg har jobb ved sida av fotballen, ler kollega Geir Ove Refvik i Tornado Måløy.

Dramatikk i botnen

I botnen av tabellen er det minst like dramatisk i kampen om å overleve i divisjonen. Florø og Vik kan begge hamne på den utsette nest sisteplassen.

Det betyr i utgangspunktet nedrykk til 4. divisjon.

Men: dersom avdelingsvinnaren skulle klare kvaliken og rykkje opp, blir det nest siste laget i 3. divisjon ståande også neste år.

Har ikkje gjeve opp

Tidlegare har både Florø- og Vik-trenaren sagt at dei håpar Førde vinn - rett og slett fordi dei trur sunnfjordingane er best rusta til opprykk.

- Eg forstår dei på ein måte. Eg har sjølv sagt i heile år at Førde er den store favoritten. Og vi har gjeve frå oss sjansen til å avgjere dette sjølv. Men det vil ikkje vere eit stort under om Høyang klarer poeng mot Førde, og vi er kapable til å slå Årdal, seier Geir Ove Refvik.

- Godt rusta

Heller ikkje Knut Erik Folland ser den heilt store skilnaden på dei to vinnarkandidatane framfor helgas seriefinale.

- Det einaste eg ser er at vi har vore gjennom ein kvalik før, og difor veit kva som ventar oss. Men eg trur begge laga er godt rusta til ein kvalik, seier Førde-trenaren.