Tre menn er varetektsfengsla i samband med sakene. I alt sju personar er pågripne.
– Vi ser at det i Sunnfjord er marknad for amfetamin, ecstasy, hasj og MDMA. Så lenge marknaden er der, så vil det komme inn narkotika. Då er det å jobbe jamt for å stogge mest mogleg, seier regionlensmann Dag Fiske.
Etablert miljø
Det første beslaget skjedde på ei leilegheit i Førde i slutten av februar. Ein mann i 20-åra frå Bergen har erkjent at han var i tettstaden for å levere narkotika.
REGIONLENSMANN: Dag Fiske vurderer ikkje dei tre narkotikasakene som eit teikn på at narkotikamiljøet i Sunnfjord har teke seg opp.
Foto: Erlend Blaalid Oldeide / NRKPolitiet tok beslag i 30 gram amfetamin, 30 gram MDMA-pulver, i overkant av 90 ecstasytablettar og 10.000 kroner.
– I leilegheita var det også tre personar i 20-40-årsalderen, som er knytte til eit etablert brukarmiljø som vi har hatt over tid, seier Fiske.
Mann pågripen på nytt
Før helga vart ein sunnfjording i 20-åra pågripen med 130 gram amfetamin og 15.000 kroner i kontantar. Etter det NRK kjenner til, sat mannen i fjor fleire veker i varetekt i samband med ei narkotikasak. Han vart lauslaten med meldeplikt og rusforbod.
Politiet mistenkjer at mannen over tid har levert narkotika til Sunnfjord og ynskjer å halde på mannen til sakene mot han er avgjorde.
I tillegg er to menn i 20-åra varetektsfengsla i fire veker etter at dei vart stogga med 1,15 kilo hasj i bagasjen. Mennene var på veg til Florø.
Fleire kan bli pågripne
Regionlensmann Dag Fiske seier sakene ikkje har tilknyting til kvarandre, men at alle er sikta for grove narkotikalovbrot. I samband med sakene har politiet, også i andre politidistrikt, ransaka husvære.
Fiske ser ikkje vekk ifrå at fleire kan bli pågripne.
– Alle er kjende for oss frå før, seier Fiske.
– Viser tre så pass store saker på så kort tid at miljøet har teke seg opp?
– Vi har ikkje konkrete signal på det. Det kan vere tilfeldig. Vi har hatt eit godt samarbeid i heile Sunnfjord og med UP-etterretning. Nokre av sakene har vi også jobba lengre tid med, seier han.
Politiet har siste åra gjort fleire større beslag av ulike narkotiske stoff. Likevel ser marknaden ut til å få forsyningar.
– Ikkje tvil om at det er fleire kanalar inn. Med ein marknad som er der, så vil det alltid vere folk som tek over når distribusjonsledd blir tekne, seier Fiske.
