Trafikktryggingsprisen til Redningsselskapet

Leiar i trafikktryggingsutvalet i fylket, Liv Stave, seier vinnaren i år er litt annleis, men at også trafikktryggingsarbeid til sjøs må verdsettast.

– Arbeidet dei gjer med opplæring i køyrereglar er viktig. Køyrereglar er like viktige på havet som på land og i luft.

– Det er viktig med det engasjementet dei frivillige i Redningsselskapet har, og det set vi veldig stor pris på, seier ho.

– Vi er stolte

I grunngjevinga for pristildelinga blir det mellom anna vist til at mange barn i Sogn og Fjordane brukar båt når dei skal til skulen, og at endå fleire er med på fritidsaktivitetar knytte til sjø og båt.

– Dette synest vi var strålande. Det er morosamt at trafikktryggingsutvalet vil gå litt utradisjonelt fram, seier prosjektleiar for distrikt og førebyggande i Redningsselskapet, Torgeir Nergaard Berg.

– Det er mange frivillige som får denne prisen i dag med stor stoltheit.

– Eit paradoks

Samtidig som Liv Stave skrytte av innsatsen til Redningsselskapet måtte ho vedgå at det var eit paradoks at prisen går til eit selskap som har gitt signal om at dei skal byggje ned i Sogn og Fjordane.

I slutten av september var det kjent at Redningsselskapet legg ned kontoret sitt i Florø, og at stillinga der blir flytta til Bergen. Omorganiseringa har blitt grunngjeve med meir effektiv drift og større miljø for dei tilsette.

Fleire i det lokale styret i selskapet har trekt seg etter at kontorflyttinga vart kjent, medan lokalpolitikarane varslar at dei ikkje vil gå med på dette utan kamp.

• Les også: Redningsselskapet fjernar distriktskontoret i Florø
• Les også: Spår medlemsflukt etter nedlegging av distriktskontor

– Vi hadde tildelt prisen, og var veldig glade, men så fekk vi vite gjennom media at det er endringar i vente, seier Stave.

– Tenesta må ikkje bli dårlegare

– Vi veit kva vi har, men det er alltid ei redsle for korleis det vil bli i framtida, seier Stave.

Ho seier dei er svært opptekne av at det frivillige arbeidet som Redningsselskapet gjer må halde fram.

– Tenesta må ikkje bli dårlegare og vi må ha eit engasjement blant dei frivillige, seier Stave.

– Minst like godt bemanna

Neergard Berg i Redningsselskapet seier omorganiseringa ikkje skal råke det frivillige arbeidet.

– Vi gjer dette for å kunne jobbe smartare. Det er einsamt å sitje åleine på kontor i Florø, og vi trur kan få meir igjen av ressursane om vi jobbar saman i ein region, seier han.

– Vi skal vere minst like godt bemanna i forhold til beredskap med dei skøytene vi har i fylket, og vi skal halde fram det førebyggande arbeidet retta mot barn og unge, seier han.

Prisen er på 25.000 kroner.

• Les også: Meiner nedlegging av Redningsselskapet i Florø er naudsynt