Leiar i fiskarlaget i Sogn og Fjordane, Jarl Magne Silden, kallar det eit «tullete vedtak frå nokon som skal ri ein paragraf heilt ut».
– Konsekvensen kan bli at fiskeflåten må liggje stille fordi det ikkje er agn å oppdrive, og store verdiar blir ståande att i havet i Nord-Norge. Det vil også få konsekvensar for landindustrien, seier han.
Bakgrunnen er denne: Domstein-konsernet har importert 13.000 pakkar med blekksprut, nærmare bestemt 280 tonn akkar, som skal nyttast som agn for torskefisket i Nord-Norge. Men, det var ein feil i tollpapira.
Sjølv om feilen i papira er retta, krev Mattilsynet anten at Domstein fraktar akkaren tilbake til Sør Korea for papirendring, eller at konsernet brenner dei 280.000-kiloa med agn.
10–12 millionar tap per fartøy
Domstein-konsernet i Måløy importerer seks millionar kilo akkar i året, rundt 90 prosent av totalimporten til Norge.
– Mattilsynet har tydelegvis bestemt seg for å statuere eit eksempel. Konsekvensen er at vi ikkje får eit skikkeleg torskefiske eller eit vinterfiske med dårlegare agn, seier konsernsjef i Domstein ASA, Rolf Domstein.
Akkar blir importert få gonger i året og importmengda tilsvarar det som går ut. Difor er det snart heilt tomt, så lenge dei 13.000 pakkane som har lege i Ålesund i tre månadar ikkje kan brukast. For Domstein kan konsekvensen bli eit tap på 5–6 millionar kroner. For fiskarane kan det bli snakk om langt større summar.
– For autolineflåten frå Sogn og Fjordane og Møre og Romsdal vil det utgjere 10–12 millionar i tapte inntekter per fartøy. For kystfiskebåtane lenger nord har eg ikkje tal. I tillegg får landindustrien ikkje råstoff til å produsere, og vil li store tap, seier Silden.
Tek saka direkte til ministeren
Domstein-konsernet har via sine advokatar sendt brev til nærings- og fiskeridepartementet med oppmoding om å gjere om vedtaket, og i tillegg send eit brev direkte til statsråd Elisabeth Aspaker (H).
Men Mattilsynet held fast på at reglane er klare.
– Denne akkaren skal ikkje inn i Norge. Den må anten sendast tilbake til Korea eller destruerast, seier seksjonssjef Malin Florvåg.
– Dokument og parti må stemme overeins. Det er ikkje høve til å gjere om på papira. Dette må vere korrekt i første runde. Ved denne typen avvisningar kan det få konsekvensar, men regelverket opnar ikkje for denne typen vurderingar, seier Florvåg.
Nærings- og fiskeridepartementet opplyser til NRK at dei nyleg har fått saka i hende, og førebels ikkje kan seie meir enn at dei jobbar for ei rask sakshandsaming.