Torde ikkje opne Vikafjellet att for trafikk

– Vegen over Vikafjellet blir ikkje opna att i dag. Det blir gjort ei ny vurdering i morgon, måndag klokka 09, sa trafikkoperatør Ove Amundsen ved Vegtrafikksentralen like over klokka 09 søndag morgon.

Like over klokka 08 søndag fekk Vegvesenet inn melding frå ein bilist som hadde møtt på eit snøras i området vest for Storhaugtunnelen. Raset var såpass stort at det dekka vegen, og bilar ikkje kom seg forbi.

Entreprenør vart varsla og køyrde opp i området for å få oversikt over situasjonen.

– Raset som har gått er ikkje så stort, men samtidig som vi fekk melding kunne meldar høyre og sjå bevegelse i snøen i området, sa Amundsen.

Mannskap frå entreprenøren som undersøkte området vurderte rasfaren som for stor til at vegen kunne opne att søndag. Det er også mildvêr i vente.

Riksveg 13 over Vikafjellet er fjellovergangen i Sør-Norge som har vore mest stengt i vinter. Ei oppteljing Vegvesenet gjorde ved utgangen av februar viste at fjellovergangen mellom Vik i Sogn og Vinje i Voss hadde vore stengd i 755 timar – altså over 31 døgn til saman.

For to veker sidan vart ein bil teken av snøskred mellom Storehaugtunnelen og Storesvingen. Det er i dette same området at det gjekk ras søndag.

• Les også: Denne fjellovergangen har vore den mest stengde

Full oversikt over stoda på vegane får du på Vegvesenet sine sider.