Tømmerstokkar skapar fare på vatnet

– Det må fjernast. Det kan ikkje liggje slik, seier Rolf Kobberstad på Grodås Camping.

Store tømmerstokkar ligg langs heile Hornindalsvatnet, noko som gjer han uroa. Raset i Skredestranda for eit halvt år sidan tok med seg enorme massar ut i vatnet. Framleis ligg det mykje tømmer overalt.

• LES OGSÅ: Vegen mellom Nordfjordeid og Stryn blir først opna måndag

– Det som skjer er at det vil flyte rundt på vatnet, og då er det vindretninga som heile tida avgjer kor det hamnar. Så det vil liggje å flytte på seg om det ikkje vert gjort noko snart, seier Kobberstad.

(Artikkelen held fram under bilete)

Fare for båttrafikken

Båttrafikken er stor her om sommaren, og det drivande tømmeret kan vere livsfarleg. Det var Fjordingen som først skreiv om faren.

– Det er direkte farleg. Plutseleg kan ein møte på og smelle i ein stokk når ein er ute i båt. Det er ikkje sikkert du ser den heller. Mesteparten ligg som regel under vatn, forklarar Kobberstad.

• LES OGSÅ: Flaum, ras og stengde vegar - sjå bileta
• LES OGSÅ: Åtvarar mot å ferdast med båt på Hornindalsvatnet

Grunneigarane må rydde

Ryddejobben vil koste fleire hundre tusen. Ansvaret ligg hjå dei tre grunneigarane som eig der raset gjekk.

Dei har søkt Statens naturskadefond om erstatning for tapt skog og opprydding, men vil likevel ikkje klare å få dekka heile beløpet som krevst for ryddinga.

• LES OGSÅ: Dette arbeidet er ikkje heilt ufarleg

Marit Anita Skrede er ein av grunneigarane. Ho er fortvila over at det no er dei som sit med heile ansvaret.

– Vi har mista mykje hogstmoden tømmer. Vi får rett nok erstatning for det vi har mista, men det står ikkje heilt i stil med det vi må betale for å få fjerna det som ligg rundt om i vatnet, seier Skrede.

– Det er fortvilande. Vi er små og hjelpelause opp i dette, seier ho.

(Artikkelen held fram under videoen)

Kan ikkje bli liggande

Ordføraren i Hornindal kommune, Anne-Britt Øen Nygård, seier dei jobba lenge med å finne kven som var ansvarlege.

Om kommunen eller andre vel å rydde opp det som har hamna på sine eigedomar, må dei igjen be grunneigarane om betaling for arbeidet.

For det er berre dei tre grunneigarane som kan få erstatning for tapet og oppryddinga etter raset i november.

– Det ser fælt ut slik det er no, og det kan ikkje bli liggjande slik. Eg trur at mange kvir seg på å begynne å rydde dette på grunn av manglande utstyr, seier Øen Nygård.

No ventar Kobberstad på at vatnet igjen skal bli trygt for dei som ferdast her.

– Det som må skje no er at det må ryddast, og det ganske fort. Det skulle ha vore gjort for lenge sidan då vatnet var mindre, men no må ein ta tak i det, seier han.