Etter 5-0-sigeren borte mot Stryn takka Sogndal-spelaren trenar Eirik Bakke for at han framleis spelar fotball.
- Sjå:
– Det har vore tøft. All honnør til Eirik. Eg hadde ikkje vore på bana att utan han. Han har sendt meg rundt overalt for å få meg frisk att. Eg har mykje å takke han for at eg står her no, seier Ole Amund Sveen.
– Spesielt å score
Skaden han siktar til skjedde i eliteserieoppgjeret på Fosshaugane for ganske over to år sidan.
.Sidan har angrepsspelaren vore gjennom mykje smerter, mange operasjonar og langt fleire treningstimar for å igjen kunne spele fotball.
Nesten på dagen to år etter skaden gjorde han comeback borte mot Ull/Kisa. I cupoppgjeret mot Stryn kom dei første måla sidan september 2016.
– Sjølv om det var ein cupkamp, så var det spesielt å score det første målet etter skaden. Det er dette eg har trena mot i to år. Først var det å kunne springe att. No er det om å gjere å bli ein god fotballspelar att, seier 29-åringen.
– Det har ikkje vore lett
Trenar Bakke er glad for å sjå Sveen vere på god veg tilbake etter den stygge skaden.
– Det har ikkje vore lett for han å reise land og strand rundt for å bli frisk, men det viser kor mentalt sterk han er. Det er framleis veldig tidleg, men no ser vi lys i tunnelen, seier han.
– Med den unge gjengen vi har her, så er vi avhengige av å få Ole Amund skikkeleg i gang att. Vi matchar han forsiktig. Det vart ein omgang sist, og i dag fekk han 45 minuttar og scora to mål. Det er kanskje litt tidleg, men han blir nok kasta inn til ulvane no, held Bakke fram.
Raskare enn før
For Sveen sin del har det vore ein lang natts ferd mot dag.
– Denne tida har eg funne ut kor mykje fotball betyr for meg. Det har vore tøft, men all kjemping og trening har vore verd det. Eg nyt kvar trening og kamp. Ein veit ikkje kor gøy det er, før ein har vore ute så lenge, seier han.
– Du verka kvikk i dag?
– Eg har trena mykje styrke i lang tid og trur eg er raskare enn då eg vart skadd. Men det er nok litt å gå på for å klare like mange raske løp som før. Det kjem.
Til helga reiser Sogndal til Aalesund der serieleiar Aalesund ventar på Color Line Stadion.