Tok ut ny jerv i Luster

Også denne jerven vart felt på såkalla ekstraordinært uttak. Ingen dyr vart skotne i den ordinære jakta.

– Vi spora opp jerven med helikopter, immobiliserte den og kontrollerte om det var tispe med ungar eller ikkje. I dette tilfellet var det ein hannjerv, og då blir dei avliva, seier rovviltansvarleg Rein Arne Golf hos Statens Naturoppsyn.

Fjerde jerv i vinter

Jerven vart avliva onsdag ved Holmavatnet aust av Gjerde i Jostedalen. Tidlegare i vinter er det teke ut ein hann og ei tispe i Luster, samt ein hann rett over grensa til Oppland .

• LES OGSÅ: KrF vil at departementet skal vere overdommar for rovdyrgrensene

– Det er ikkje mykje jerv i Sogn og Fjordane. Vi har teke ut ganske mange jerv kvart år, men det er veldig gode område for jerv som gjer at fort kjem inn nye individ. Det har det gjort i år, og det kan det gjere vidare framover både til våren, sommar og hausten, seier Golf.

Skal ikkje vere

Jerven har siste året gjort rekordlite skade , men Sogn og Fjordane er del av rovviltregion 1 der Stortinget har sagt at det ikkje skal vere hi eller reproduksjon av jerv.

I vinter vart det gitt løyve til å felle totalt fem jervar i regionen. Då lisensjakta var over i midten av februar var ingen felte.

Beitedyr er prioritet, og Direktoratet for Naturforvaltning gir difor løyve til ekstraordinære uttak i Sogn og Fjordane.