- Eg gret då eg såg videoen, seier Sogndals midtbanespelar Ahyee Aye Elvis.
Ivorianaren vart søndag involvert i dramaet på direktesendt TV frå Fosshaugane: Heilt mot slutten av kampen fekk han eit kne i tinningen og vart liggjande medvitslaus på bana.
Først fleire minutt seinare kom han til seg sjølv. Då gjekk turen på sjukehus i Førde med hjerneskaking.
- LES OGSÅ:
Hugsar ingenting frå episoden
For dei som såg kampen på TV eller som var til stades, såg situasjonen veldig dramatisk ut.
Det gjer det i ettertid også for Elvis sjølv.
- Det ser ikkje bra ut, og alle verke å vere redde då dei såg det. Eg låg jo der med auga opne - akkurat som om eg var død, forklarer han.
Han hugsar ingenting frå duellen, der han fekk smellen i hovudet.
Kona var veldig redd
Heller ikkje då det medisinske personellet i Sogndal spurde han ulike spørsmål, kom det noko fornuftig frå han.
Det var først då kona spurde han om datoen for bursdagen sin, at han kom med det rette svaret.
- Då vart eg letta. Eg skjønte at alt var i orden, seier ho til NRK.
- Men eg var veldig redd då eg såg kva som skjedde, legg ho til.
Håpar å vere snart tilbake
NRK fekk måndag ein prat med Elvis på sjukehuset i Førde. Der vart han utskrive, men han rekna med at det vil ta tid å komme tilbake på fotballbana.
- Eg må ta heilt fri i fire-fem dagar. Men det gjer ingenting - eg skulle uansett sone helgas kamp mot Bodø/Glimt på grunn av tre gule kort, ler han.
Sjølv håpar han å vere tilbake i løpet av eit par veker. Men i Sogndal er dei glade om han er tilbake i løpet av året.
- LES OGSÅ:
- Det var ein solid smell. Det er vanskeleg å seie nøyaktig kor mange veker dette vil ta, men erfaringsmessig er det ein stor bonus om han er tilbake i løpet av sesongen, seier medisinsk koordinator Kim Are Jacobsen.