NRK Meny
Normal

Tok opp svinedyr ekstrakostnad i Stortinget

Mange må punge ut med titusenvis av kroner ekstra om dei skal bygge hus. No vil Sveinung Rotevatn (V) ha fortgang i raskartlegginga.

Sveinung Rotevatn frå Venstre på Stortinget

VILLE HA DEBATT: Sveinung Rotevatn (V).

Foto: Varfjell, Fredrik / NTB scanpix

– Eg fryktar det vil ta veldig lang tid å få ferdig karta. Imens får mange 70.000 – 100.000 i ekstrakostnadar, seier Rotevatn (V).

Medan folk i enkelte kommunar slepp unna, må andre familiar punge ut med titusenvis ekstra om dei vil bygge hus.

NVE får ikkje unna arbeidet med å kartlegge ras og skredfare i kommunane. Men skal ein få byggeløyve i utsette område, må kartlegginga vere ferdig. Utvegen for folk blir å koste geologar sjølve.

Mange må punge ut

I februar fortalde NRK om Tonje Camilla Løfsnes Sjaastad og familien som ynskjer å bygge hus ved Eidsfjorden.

Tonje Camilla Løfsnes Sjaastad

BYGGEKLAR: Tonje Camilla Løfsnes Sjaastad.

Foto: Asgeir Heimdal Reksnes / NRK

– Vi vil rive det gamle og bygge nytt. Vi er nøydde til å koste ras- og grunnundersøkingar. Vi vil jo sjølvsagt at det skal vere trygt når vi skal bu her med borna våre, sa ho.

Tok saka opp i Stortinget

Denne veka tok Sveinung Rotevatn (V) saka opp til debatt i Stortinget:

– I Sogn og Fjordane til dømes er det plukka ut 41 område som skal kartleggast, men berre 19 har fått fyrsteprioritet. I dei andre områda betyr dette i praksis byggestopp, med mindre ein sjølv tek kostnadane, sa han.

– Tek for lang tid

Det kan ta 25 år før karta er ferdige med dagens løyvingstakt, fryktar Rotevatn. Også KrF sin stortingsrepresentant Rigmor Andersen Eide er kritisk:

Rigmor Andersen Eide

UROA: Rigmor Andersen Eide (KrF).

Foto: Åserud, Lise / NTB scanpix

– I valet mellom å vente eller å betale sjølve kan ein fort ende med å busetje seg andre stader. Dette er ikkje å ta heile landet i bruk, sa Eide.

Meiner Stortinget har ansvar

Olje- og energiminister Terje Søviknes (Frp) lovar meir pengar, men kan ikkje seie kor tid alle har fått sitt. Han meiner også Stortinget har ansvar:

Terje Søviknes

PEIKA PÅ STORTINGET: Olje- og energiminister Terje Søviknes seier det per no blir brukt 70 millionar på kartlegging.

Foto: NRK

– Eg skal følgje opp og skubbe på NVE. Så ser eg fram til at Rotevatn og andre får Stortinget med på å løyve pengar. Det skal ikkje vere meg i mot, sa Søviknes.

Sveinung Rotevatn er oppgitt over at berre Venstre, KrF og Frp deltok i Stortinget.

– Eg sakna dei andre partia, og særleg Sp.

Tommel opp for husbygging

Tilbake på Nordfjordeid har Tonje Camilla Løfsnes Sjaastad i vår hatt geolog på tomta.

Familien fekk til samarbeid med naboar om felles kartlegging som pressa rekninga ned frå 100.000 til i overkant av 30.000 kroner. No gler dei seg til husbygging:

– Vi har fått klarsignal på at tomta er trygg.

Det er lurt å samarbeide med andre er hennar råd til folk i same situasjon.

– No blir det husbygging, heilt klart, seier Løfsnes Sjaastad.

Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.