To av tre vil skattlegge turistane i dei mest populære reisemåla

– Eg har inga tru på eit system der midlar hentast inn og fordelast ut igjen sentralt, seier dagleg leiar for Loen Skylift, Richard Grov.

Ei undersøking frå Innovasjon Norge viser at fleirtalet av befolkninga i dei mest pressa områda ønskjer ein turistskatt, skriv Aftenposten.

– Dette kan fort føre til sentraliserte vedtak, og påverke kor turismen i dag har si verdiskaping, seier Grov.

Vil unngå ei nasjonal ordning

Heile 65 prosent i pressområda Aurland og Stryn, men også Lofoten, Geiranger og Stavanger seier dei vil ha turistskatt, i ei eller anna form. Innovasjon Norge si undersøking spesifiserer ikkje kva type turistskatt det er snakk om – lokal eller nasjonal.

I Stryn har dei tidlegare somrar fått merke utfordringane i høgsesongen og har gjort grep lokalt, men Stryn-ordførar Per Kjøllesdal (Sp) er skeptisk dersom det blir ei nasjonal ordning.

– Om det vert ei lokalskatt som går til det området han er betalt, så trur eg det kan vere ei tenleg ordning. Om det vert ei nasjonalskatt som går til Oslo og det vert sendt ut delar av han, så er eg meir skeptisk, seier han.

Han opplever ikkje at turistane skapar store problem i Stryn, men seier situasjonen til dømes i Lodalen har vore til irritasjon.

– Det må me openbert unngå. Om turismen vert ei belastning for lokalbefolkninga, så har me eigentleg tapt. Me er nøydde til å prøve å unngå det, seier ordføraren.

Open for tanken

Ein som ikkje er like skeptisk er dagleg leiar i Fjord Tours, Steinar Aase. Han trur turistskatten kan føre til større økonomisk vinning, dersom han vert forma ut på riktig måte.

– Ein turistskatt helsar eg velkommen, dersom den kan gje ei verdiskaping som er basert på dei premissane me ønskjer, seier han.

Aase, som også helst ynskjer ein lokal variant, meiner i likskap med Kjøllesdal at det er viktig at dei lokale myndigheitene får det dei har krav på.

– Skatten kan godt takast inn sentralt, men då må gevinsten fordelast ut igjen til kommunane den høyrer heime i.