Til topps med jernkuler

– Det var veldig tungt og intenst. Men det gjekk fint til slutt. Eg er veldig fornøgd med dagens innsats, seier 22-åringen frå Jølster.

Nøgd bør ho kanskje vere når ho under Valhalla Open i Oslo sette ny skandinavisk rekord for sin klasse.

• Les også: Dette er den nye treningsformen

Fekk prøve seg før jul

Treningsforma kettlebell, der ein trenar styrke og uthald ved å løfte på ei eller to spesielle jernkuler, har tatt norske treningsstudio med storm. No er det også blitt ein sport.

– Den er vel ikkje blant dei store, men det er ein raskt veksande sport, seier Støfring som sjølv vart introdusert for fenomenet så seint som nett før jul i fjor.

– Det kom ein trenar over til Jølster treningssenter frå Austlandet før jul. Han spurte om vi ville prøve kettlebells. I starten vart det ein slags vekas utfordring. Så vart det meir og meir, seier Støfring til NRK.

Det skulle raskt vise seg at ho og sambygdingen Therese Sivertsen hadde talent for sporten.

– No blir kalla «gærningane» frå vest, ler 22-åringen.

(Artikkelen held fram under biletet.)

2 x 20 kg i 10 minutt

Laurdag konkurrerte dei begge i vektklassen for damer på 70 kg minus.

– Du har forskjellige øvingar du konkurrerer i. Vi konkurrerer noko som ein kallar long cycle. Då skal ein løfte to kuler. Først opp i hoftehøgd, deretter opp over hovudet i ei lang rørsle.

Med to kuler på 20 kg kvar rakk Støfring 68 repetisjonar på ti minutt. Det heldt til førsteplass og ny skandinavisk rekord i sin vektklasse.

Treningsvenninna Therese Sivertsen (33) tok andreplassen med 55 repetisjonar, mens danske Dorthe kom på tredjeplass.

(Artikkelen held fram under videoen)

• Sjå video: Slik trenar du med kettlebells

Siktar mot verdsrekord

– Kvifor kettlebells?

– Det gir meg veldig mykje. Det går mykje på det mentale. For å gjennomføre det må ein vere skjerpa, svarer den nybakte skandinaviske rekordhaldaren.

Sunnfjordingen som til dagleg jobbar som assistent ved Vassenden skule og personleg trenar på Puls Førde har alt sett seg ut neste mål.

– Det må bli å ta verdsrekorden i 2x24 kg.