Tidlegare eigar: – Vi kvir oss til å sjå hotellet

– Vi kvir oss til å sjå hotellet. No har vi følgt med på dei bileta som er lagt ut på nettet og det ser heilt forferdeleg ut, seier tidlegare eigar Harald Berge.

• Les også: Selje Hotel tapt i storbrann

Store delar av Selje Hotel har gått tapt i ein brann fredag morgon. Hotellet var vinterstengt og det var ikkje folk i bygningen då den tok til å brenne. Harald og Gerd Kjellaug Berge åtte og dreiv hotellet i 38 år, men selde hotellet for to år sidan. Harald Berge håpar ryddearbeidet kjem raskt i gang.

• Les også: Ola høyrde fleire smell frå hotellet

– Bygda har bruk for hotellet. No har det vore hotell i Selje i 40 år, så den epoken bør ikkje få ein slik slutt. Eg håpar det blir sett full fart med ryddearbeidet, slik at arbeidet med å bygge opp att kjem rask i gang.

• Les også: Selje Hotel tapt i storbrann

Mange tankar

Ekteparet Berge var i Sogndal då dei fekk vite om brannen fredag morgon, og Harald Berge fortel at dei er usikre på om dei drar opp att til Selje fredag eller laurdag. Gerd Kjellaug Berge fortel at det er vanskeleg å skildre korleis det kjennest å sjå hotellet dei har drive i nærare 40 brenne ned.

– Det er heilt sjokkarta. Når vi no sit og ser på ein video som NRK har lagt ut på nettet, så er det mange tankar som surrar rundt i hovudet. Trist blir eit lite ord i denne samanhengen.

Livsverk

Selje Hotel vart livsverket til ekteparet Berge. Gerd Kjellaug fortel at dei i timane sidan brannen vart kjent har fått støttande meldingar frå tidlegare gjestar og andre. Ho trur det bør vere mogleg å få til eit nytt hotell i bygda og fortel at dei har mange gode minner frå tida på det gamle hotellet.

– Det vart eit livsverk for oss. Vi kom til Selje då vi var i trettiåra og hadde små barn. Heile oppveksten til barna, og liva våre har vore på hotellet. Det vart ein epoke for oss, og vi har mange gode minner.