NRK Meny
Normal

Så langt er Thomas (18) frå EM-billett

Kasttalentet Thomas Mardal (18) imponerande då han i helga starta friidrettssesongen. Allereie er han berre 1,31 meter frå å klare diskoskravet til sommarens U20-EM.

Thomas Mardal

OVERRASKANDE: Berre ei veke etter treningsopphaldet i Portugal, slo Thomas Mardal til med 52,49. – Det var godt over forventing i høve dagsforma. Kroppen var framleis tung og hadde ikkje kome seg heilt etter reisa og slikt, gliser han.

Foto: Truls Kleiven / NRK

Under sesongopninga på Loggane i helga landa diskosen på 52,49 meter. Kravet til U20-EM i Sverige er 53,80 meter.

Fristen for å klare EM-kravet er 6. juli.

– Med eit bra treff i løpet av sesongen så kan eg kaste eit par meter lenger. Under treningsopphaldet i Portugal hadde eg kast over kravet, seier Thomas Mardal.

Håpar på motvind

18-åringen har i år tatt steget opp til 1,75 kilos diskosen. Ein diskos han stort sett fekk kjennskap til og konkurrerte med på tampen av sesongen i fjor. Allereie har han forbetra seg med kring tre meter.

Mardal meiner å vere kapabel til å slenge den nokre meter til. Og lenger enn 1,31 meter som er det han manglar på EM-kravet. No håpar han på motvind i stemna framover.

– I Portugal hadde eg ganske mange kast på 53 meter. Det var i god vind, men det viser at det kan gå under gode forhold. Eg håpar på motvind framover, smiler Mardal.

EM det store målet

Mardal er nok eit kasttalent i rekkjene bak Trude Raad og Marte Rygg Årdal som har grodd fram gjennom friidrettsmiljøet i Gloppen. I fjor kom han mellom anna heim frå ungdoms-NM med fem gull og eitt sølv.

No er Mardal, Hans Sande og Evald Osnes Devik blant talentfulle GFIL-utøvarar som Friidrettsforbundet ynskjer å satse på.

– U20-EM er det store målet for sesongen, men skulle det ikkje gå, så er det vel eigentleg ikkje anna å vente, seier han.

Tek ut troppen 7. juli

– Eg er i aldersgruppa under dei beste utøvarane som vil vere der. Konkurransen er for utøvarar opp til 19 år, så det er eigentleg mykje å vente at ein 18-åring skal klare kravet, legg han til.

Meisterskapen går i svenske Eskilstuna 16. til 19. juli. Friidrettsforbundet tek ut den norske troppen 7. juli. Der vil gjerne 18-åringen frå Gloppen vere.

– Framover blir det å trene godt, og eg har planar om å delta i godt med stemne dei neste månadane. Så får vi sjå korleis det går, avsluttar Mardal.

Bønder føler seg ikkje trygge på vegen med traktor
Orkanen Tor var ikkje ekstrem nok
Ordninga bør endrast