Tente 45 000 kroner per minutt

Azar Karadas spelte, etter det NRK har funne ut, berre ein seriekamp for sin tyrkiske klubb i 2010. Til gjengjeld fekk han alle minutt på bana.

Med ei skattbar inntekt på over fire millionar kroner, gir det ei snittinntekt på 45 000 kroner minuttet for fotballspelaren.

Sunnfjording på andre

Det plasserer 30-åringen desidert på inntektstoppen for idrettskjendisane frå Sogn og Fjordane. Meir enn tre gonger meir enn nestemann på lista, Alexander Ødegaard.

Sunnfjordingen som i fjor spelte fotball for Viking i Stavanger noterte seg, ifølgje skattelistene som vart sleppte i dag, for ei inntekt på 1,6 millionar kroner. Med sine 1 387 minutt med vikingtrøya i fjor, gir det eit snitt på 1 206 kroner for kvart spelte minutt.

Ein god nummer tre

Spriken frå Ødegaard til «bronseplass» er på kring 400 000 kroner. Der finn ein glopparen og langrennsløparen Odd-Bjørn Hjelmeset (40). Han er tredje og siste idrettskjendis på vår liste som står med over millionen i skattbar inntekt.

• LES OGSÅ: – Skattelistene er ikkje til å lite på

I tillegg til å vere sponsorsjef i Terra, er Hjelmeset eineeigar av verksemda Trygg Leik, der kona Elisabet er administrerande direktør. Verksemda, som mellom anna driv med føredrag, skiskule og marknadsføring og sal av tenester innan sport og fritid, enda i fjor opp med eit driftsresultat på 1 279 000 kroner.

Suksess for Bø

Skiskyttarane Tarjei Bø og Ann Kristin Aafedt Flatland opplevde suksess i skisporet førre sesong.

• LES OGSÅ: Dette tente sogndalspelarane

Korleis bonusane slo ut på lommeboka ser ein truleg først på listene til neste år. Bø som enda opp med å vinne verdscupen samanlagt, enda opp på 10. plass på vår oversikt med ei inntekt på 588 000 kroner.

23-åringen rakk fleire pallplassar og sin aller første verdscupsiger nokon gong. Tidlegare på vinteren var han også med på det norske OL-gullet på stafetten.

Verdsmeister

Bø vart også verdsmeister saman med Aafedt Flatland (29) og det norske mixed-laget på stafetten i Russland.

Sistnemnde, som nytta sesongen til å sikre sin første siger i verdscupen, enda med ei inntekt på nær 340 000 kroner.

Med det var ho også den kvinnelege idrettskjendisen som er notert med høgast skattbar inntekt.

Flo-suksess

Ein annan som hadde sportsleg suksess i fjor, er tidlegare landslagsspelar i fotball, Jostein Flo. Som sportsdirektør i Strømsgodset sikra stryningen cupmeisterskap til Drammen.

47-åringen kan heller ikkje klage over 2010 økonomisk med ei inntekt på 677 000 kroner, og plassen framfor fotballpresident Yngve Hallén på vår uoffisielle liste.