I førre veke vart serveren til Telenor bombardert av mail frå utlandet, og overbelastninga førte til forseinkingar hos fleire hundre tusen brukarar.
- Lurer på om folk er sure på meg
Online.no-brukar Jan Eide lurer på om han sit i Kjølsdalen og sender mail fånyttes.
- Eg har sendt epostar til ein del folk utan å få svar, så det må vere kluss ein eller annan stad.Eg redigerer ei webside, og då hadde det no vore kjekt å få svar på slikt som eg lurer på. Når eg ikkje får svar lurer eg på om dei er sure på meg.
Serverproblem
Fleire av online.no-brukarane i Norge kan også denne veka oppleve å motta mailar som kjem forseinka på innboksen grunna serverproblema til Telenor.
Eide treng å lite på at mailen hans fungerer, og ringde Telenor då han oppdaga feilen i førre veke. Men han har framleis problem med å motta mail som vert sendt til innboksen hans.
- I orden denne veka
Men informasjonsdirektør i Telenor, Per Arild Meling, seier problema med serveren skal vere løyste denne veka.
- Det har kome svært mange epostar frå utanlandske serverar, og vi arbeider no med å stengje desse ute. Vi har framleis problem, men ikkje i ein slik grad som i førre veka. Eg trur at dei aller fleste av våre brukarar ikkje skal ha problem med å send eller ta imot post i dag.
Gamle epostar kjem fram
- Kva med epostar som har vore sende og som ikkje har kome fram?
- Det er framleis litt tregheit i systemet, så det vil nok dukke opp ein og annan gamal epost som har lege i kø.