– Ein blir litt miljøskadd når ein er van til å trene så mykje, seier vektløftaren frå Jølster.
Saman med kjærasten er ho på ein tre månaders tur jorda rundt. Første stopp er Hongkong før turen går vidare til mellom anna Vietnam, Thailand og USA.
Etter EM i vektløfting i Sunnfjord er det godt med ein pause, sjølv om det også er treningsklede i bagasjen.
– Det har vore intenst med trening før EM. No har eg planar om å sjå verda og få ein haug med nye opplevingar og inntrykk.
- Les også:
Vil halde styrken ved like
Det er under tre veker sidan Tambarskjelvar-løftaren gjekk på podiet framfor eit ellevilt heimepublikum i Førde. Eitt heilt år hadde ho teke fri for å trene mot EM. Målet var personlege rekordar, men ho vart ståande med 83 kilo i rykk og 93 kilo i støyt, to og seks kilo bak sine eigne persar.
– Når alt kjem til alt er det ikkje så nøye om eg kom på ein 19. plass eller ein 15. plass. Eg sit att med ei stor oppleving, seier 23-åringen.
Målet vidare er allereie spikra, EM i Split neste år. Det trur ho er innan rekkevidd om ho trenar godt. 23-åringen understrekar at trening ikkje er hovudprioritet på ferien, men likevel:
– Eg tenker framover og har lyst til å halde styrken ved like så godt som det går an på ein slik tur. Slik at det kan gå lettare å kome tilbake i form til hausten, seier ho.
Ligg ikkje på latsida
Målet under turen er å få inn ei til to styrkeøkter i veka.
– Blir det slik at det første du ser etter når de kjem til ein ny plass er moglegheiter for å trene?
– Nei, ikkje det første … Men kanskje det andre, flirer ho.
– Eg har brukt Google til å prøve å søke opp plassar til å trene, seier ho og vedgår at ho ser seg om etter treningssenter alle plassar dei er.
Torsdag var ho akkurat ferdig med si andre økt i Hongkong. Der fann ho eit crossfit-senter som passa midt i blinken. Og når ho først finn dei rette fasilitetane er det ikkje små koseøkter ho køyrer.
– Hehe, eg vil ha litt vekter på når eg har moglegheit. Det blir spennande å sjå om eg må ned på vektene i løpet av turen eller om eg klarar å halde det noko lunde ved like.
- Les også:
- Les også:
– Mi form for åleinetid
For reisefølgjet, kjærasten, er det heilt greitt at ho må trene innimellom.
– Han er vel byrja bli van med at eg skal trene titt og ofte.
– Blir han med på trening?
– Han er som regel ikkje med. Det blir vel mi form for åleinetid. Vi kan ikkje gå oppå kvarandre heile døgnet i tre månader, flirer ho.