Det var knytt spaning til om ministeren ville lette på sløret og seie noko om kva tid han kan tenkje seg at dei nye store opprustingane på E39 gjennom fylket kan starte opp. Men det var umogleg å få noko som helst ut av han om dette.
Gangfelt og fartsdumpar
E39 går gjennom trafikkerte Førde sentrum med mange gangfelt, fartsdumpar og 40-soner. Når folk skal til og frå arbeid, er køane er ofte lange inn ut av byen. Dette er noko av bakgrunnen for at ein heilt stamvegtrasé utanfor Førde sentrum er under planlegging.
–Vi ønskjer ikkje at hovudvegane våre skal ha 40-sonar, fartshumpar og fotgjengarovergangar, sa Solvik Olsen utan å ville seie noko som helst om tidspunkt for oppstart av ny trasé utanom Førde sentrum.
- Les også:
Vil koste mange milliardar
Vegen utanom Førde sentrum som må leggjast mykje i tunnel er kostnadsrekna til mellom 3,5 og 5 milliardar kroner.
Førde-ordførar Olve Grotle (H) hadde følgjande kommentar etter å ha snakka med Solvik-Olsen.
– Eg er sikker på at statsråden, no når han køyrer gjennom fylket, ser at det er nødvendig å få ein ny veg forbi Førde. Kva tid vi kan kome i gang veit eg ikkje, men det er mi oppgåve å vise korleis situasjonen er i dag, sa Grotle.
- Les også:
Taus om Nordfjord-start
I Nordfjord har regjeringa vedteke at indre line frå Byrkjelo gjennom Utvikfjellet med bru over Nordfjorden skal vere den nye stamvegen.
– No har planprogrammet kome i gang. Det vil vere grunnlaget når vi skal prioritere i Nasjonal transportplan, sa Solvik-Olsen.
Ordførar Sven Flo i Stryn (H) var klar på at han ønskjer raskast mogleg framdrift.
– Planprosessen er i gang og vi håper veldig mykje vil vere avklart i 2018. Då ligg ikkje dette så langt fram i tid, sa Flo.