– Det var eit lite sjokk å bli tatt ut, men det kjennest bra, seier Kjerstin Boge Solås.
Tysdag føremiddag vart troppen Thorir Hergeirsson skal ha med seg til Sverige i desember klar. Der er 18 år gamle Kjerstin Boge Solås frå Sunnfjord med. 18-åringen spelar til vanleg eliteseriehandball for Tertnes, ho får ein spanande slutt på året.
– Først er det to viktige kampar med Tertnes, ein seriekamp og ein semifinale. Det er dei eg konsentrerer meg om no. Så blir det å legge eit bra grunnlag for EM. Eg trur det er viktig å gå inn i meisterskapen med litt ekstra sjølvtillit.
- Les også:
Sjeldan moglegheit
Sunnfjordingen fekk sin landslagsdebut tidlegare i haust då ho spelte to kampar i ei firenasjonersturnering i Danmark. Boge Solås trur det blir endå meir trykk i EM.
– Eg har kjent litt på korleis det er å vere på landslaget no under Golden League i Danmark, men det blir nok endå meir trykk no. Eg må fokusere på å senke skuldrene og nyte det, det er ikkje ofte eg får ein slik moglegheit.
- Les også:
– Medaljelag
Øystein Havang er handballekspert for NRK. Han trur det kan bli vanskeleg å få mykje speletid og at det blir ei jokerrole, i tillegg til å jobbe i forsvaret. Likevel trur han Boge Solås har noko å bidra med.
– Det er sjølvsagt veldig stort for henne. Eg trur ho er med for å få erfaring, men ho er ein spelar for framtida og har kvalitetar som gjer ho i stand til å bidra om ho får sjansen.
Årets utgåve av Noreg har fleire unge spelarar og overraskingar. Likevel trur Havang at årets utgåve av Noreg er godt nok for medalje.
– Med den tradisjonen og den kulturen som er bygd opp i det norske laget så veit dei kva som skal til for å kome til semifinale og kjempe om medalje.
Framtida
Etter pressekonferansen der den norske troppen vart presentert fortalde landslagstrenar Thorir Hergeirsson at Boge Solås er ein spelar for framtida.
– Ho er ein spelar med kvalitetar som blir stadig viktigare i internasjonal handball.
Ei av dei etablerte spelarane som ikkje er tatt ut til årets EM er Ida Alstad. Ho har lenge vore viktig i forsvaret. Hergeirsson trur Boge Solås er klar til å ta den rolla.
– Alstad er ein god spelar, men vi trur dei som kjem inn kan løyse rolla hennar godt. Anten er dei betre i dag, eller så kan dei bli det.
Hege Bakken Wahlquist frå Årdal var saman med Boge Solås med i bruttotroppen til meisterskapen, men vart ikkje tatt med i den endelege troppen.