Veggen flytta seg, taket fall ned – og så måtte naboen flykte

Kristine Ramberg Aasen fekk oppleve ein juleferie ho seint vil gløyme. Heime hos svigerforeldra i Flåm starta dramatikken i går kveld.

– Vinden vart sterkare og sterkare, huset rista og heile vinduskonstruksjonen vart øydelagt. På loftet vart eit vindauge knust og fjernsynet datt på golvet, seier ho.

– Den næraste naboen kom styrtande over til oss. Heile innerveggen i huset deira hadde flytta på seg og delar av taket datt ned. Dei frykta at heile huset skulle ramle saman. Det var skikkeleg dramatisk, seier Ramberg Aasen til NRK.no.

• LES OGSÅ: Tusenvis i Vågsøy utan samband
• LES OGSÅ: Uvêret tek pause - så aukar det på

(Artikkelen held fram under biletet)

Var redd for dattera

– Kor redd var du?

– Då dei verste vindkasta kom og huset rista skikkeleg, var eg redd for kva som kom til å skje. Eg sprang inn på soverommet til vesledattara mi, men ho låg heldigvis trygt i ro og sov, fortel Ramberg Aasen.

Ho bur vanlegvis på Austlandet og skal attende dit i kveld.

– Vi skal til Oslo i kveld, og eg lurer på om vi i det heile kjem oss over fjellet, seier Ramberg Aasen.

• LES OGSÅ: Hadde ikkje oversikt over vegane
• LES OGSÅ: Kan bli straumlause i fleire dagar

(Artikkelen held fram under biletet)

Masse tre ligg velta

– Det held på å bli lyst i Flåm. Korleis ser det ut i bygda?

– Det er haugevis av tre som har falle ned, dregne opp etter røtene. Eg ser mange hus utan takplater. Hos ein av naboane har eit tre falle over bilen deira. Delar av pipa i huset her har falle av, og det er slått hol i gangen ved taket, seier Ramberg Aasen.

• LES OGSÅ: Må ha lys for å sjå skadeomfang
• LES OGSÅ: Tankskip var i stor fare

– Eg har aldri opplevd noko slikt før. Det er forferdeleg, seier ho. NRK har vore i kontakt med naboen som måtte flykte frå huset sitt, men han hadde ikkje tid til å prate med oss.