Hopp til innhold

Systrene Frøyen opna dørene for turistane

KALVÅG (NRK): – Vi har vaska og styra på så det skulle bli presentabelt. Dei verka både veldig interesserte og takksame.

Systrene Jorunn og Margrethe Frøyen opna dørene.

OPNA DØRENE: Systrene Jorunn og Margrethe Frøyen tykte det var stas å kunne servere dei britiske turistane svele med syltetøy og brunost. – Vi håpar turistnæringa kan gi heilårsarbeidsplassar og medverke til ei berekraftig næringsutvikling, seier dei.

Foto: Aleksander Åsnes / NRK

Det fortel systrene Jorunn og Margrethe Frøyen. Måndag opna dei dørene til det nær 100 år gamle sveitservillaen for dei første cruiseturistane i Kalvåg.

På menyen stod ekte vestlandskost, med sveler, syltetøy, brunost – og sjølvsagt kaffi.

– Det var som å ha besøk av vanlege gjester. Eg trur dei sette pris på at heimekos var i sentrum, seier Margrethe.

Inviterte på heimebesøk

Britiske turistar ynskt velkomen av skuleborn i Kalvåg.

VELKOMNE: Både små og store gjorde sitt for at dei første cruiseturistane skulle kjenne seg velkomne i Kalvåg.

Foto: NRK

Det var britiske passasjerar om bord på cruiseskipet Saga Pearl 2 som allereie i februar opna cruisesesongen 2018. På programmet stod mellom anna guida tur til Grotle, Heimen og hjortegarden.

Og heimebesøk hos systrene Frøyen i sentrum av Kalvåg. For turistar som kjem til Norge vil ha ei autentisk oppleving av nordmenn sin kvardag. Og det ville systrene gi.

SJÅ VIDEO: Britiske turistar på heimebesøk i Kalvåg.

– Det var kjekke folk. Dei var interesserte i å høyre om huset og Kalvåg, og ein del antikvitetar som vi sette fram, fortel Jorunn.

Likte sveler og brunost

– Sveler var nytt for dei, men dei gav uttrykk for at dei likte det, legg Margrethe til og fortel at britane var nyfikne både på sveler og brunost.

– Kvifor opne dørene for turistar?

Britiske turistar i Kalvåg.

LIV OG RØRE: Britiske turistar gav Kalvåg liv og røre på ein elles stille og roleg vinterdag.

Foto: NRK

– Vi ynskjer at det skal komme cruiseturistar hit, og her er det i utgangspunktet ikkje så mange attraksjonar. Så då vi fekk spørsmålet tenkte vi «kvifor ikkje?». Det er jo for å gjere eit godt inntrykk og marknadsføre Kalvåg på ein god måte.

Kjem gjerne tilbake

Det ser Kalvåg ut til å ha gjort i sitt første cruiseanløp.

– Vi reiser ofte til Ålesund, Bergen og Stavanger, som har eit stort tal innbyggjarar og mange turistar. Å komme hit til eit urørt område er fantastisk. Eg håpar på fleire anløp her, seier kaptein Nick Sutherland om bord på cruiseskipet.

Saga Pearl 2 i Kalvåg

SAGA PEARL: Årets første cruiseskip, og det første til Kalvåg noko sinne, klappa til kai måndag morgon.

Foto: Aleksander Åsnes / NRK

– Det er eit flott landskap og fine menneske, legg han til.

– Ein merkedag

Dette er gode ord for øyra til Jan Fredrik Fosse. Innehavaren av serveringsstaden Knutholmen har i to år jobba for å få cruiseskip til å stogge i Kalvåg.

Jan Fredrik Fosse

NØGD: Jan Fredrik Fosse er ei av eldsjelene som har jobba for cruiseskip til Kalvåg. – Eg hadde sett meg føre eit cruiseskip seinare i sesongen, men å få det på denne årstida trur eg er opptur for alle som driv innan næringa, seier han.

Foto: Aleksander Åsnes / NRK

Han håpar Saga Pearl 2 ikkje er første og siste cruiseskip som stoggar i Kalvåg.

– Eg håpar vi gjer eit så godt inntrykk at både dei, og fleire, kjem til Kalvåg, seier han etter det som best kan skildrast som ein festdag for lokalsamfunnet i Bremanger.

Cruiseskipet vart møtt av korsong og vaiande norske flagg. Og turistane skapte langt meir liv og røre i gatene enn det som er vanleg på denne årstida.

– Det har vore skikkeleg god stemning. Det er ein merkedag for Kalvåg og Bremanger, seier han.