– Det er urovekkjande at vaksinen ikkje har tilstrekkeleg effekt

Einingsleiar ved Helsetunet i Førde Sogn og Fjordane, Una Holmelid, likar ikkje at årets vaksine ikkje fungerer optimalt.

– Det er urovekkjande at vaksinen ikkje har tilstrekkeleg effekt. Vi har mange eldre, svake og sjuke pasientar og det kan få fatale følgjer dersom dei får alvorleg influensa, seier ho.

Avdelingsdirektør Siri H. Hauge ved Folkehelseinstituttet forstår uroa ved Helsetunet i Førde.

– Situasjonen styrkar ønsket vi har om å få vaksinar som har høgare beskyttelse, som varer lengre og som verkar betre på dei eldre, seier ho.

• Kommunelege: Vask hendene, unngå smitte

– Uansett viktig

Det er Folkehelseinstituttet sjølv som har påpeika at årets influensavaksine kunne fungert betre. Spesielt influensatypane A (H3N2) og B/Yamagata blir det forventa at årets vaksinar berre vi ha låg til moderat effekt.

– For personar i risikogruppene er det likevel viktig å vaksinere seg. Sjølv om ikkje vaksinen beskyttar deg mot sjukdom, kan den sørge for at sjukdomsforløpet blir mindre alvorleg, seier Hauge.

Fryktar å bli alvorleg sjuk

Erling Hage frå Haukedalen i Førde er uroa. 83-åringen fryktar han skal få alvorleg influensa.

– Sjansen for å bli sjuk er større enn vanleg fordi vaksinen ikkje fungerer optimalt. Det er sjølvsagt dumt, seier Hage (83). Han har teke vaksine dei siste åra og har unngått influensa. Hage bur på institusjonen Førde Helsetun.

– Eg skal vaksinere meg og håper å unngå alvorleg sjukdom, seier han.

Mange døyr kvart år

Årleg døyr om lag 1000 personar av influensa i Norge og i fjor vart spesielt mange råka. Berre på ein sjukeheim i Molde, Bergmo omsorgssenter, vart det registrert fire influensadødsfall i løpet av fire veker i fjor.

Det er dei eldre aldersgruppene og folk som er svekka og har lågt immunforsvar som oftast blir alvorleg sjuke av influensa.

– Vi kan vente sjukehusinnleggingar og dødsfall, seier Hauge.

Frivillig for pasientane

Det blir tilrådd at om lag 1,5 millionar nordmenn vaksinerer seg mot influensa.

– Vi oppmodar alltid om at pasientane vaksinerer seg, men det er frivillig. Det er også ønskeleg at flest mogleg av dei tilsette vaksinerer seg, seier einingsleiar Una Holmelid.

Det er Verdens Helseorganisasjon (WHO) som to gonger i året bestemmer samansetjinga av vaksinen.

Hauge påpeikar at det er usikker kva type influensavirus som får størst utbreiing i vinter og at det også kan vere regionale forskjellar.

– Undersøkingar viser at store delar av befolkninga hadde god beskyttelse mot enkelte typar influensa før sesongstart. Det kan bidra til at årets utbrot blir mindre kraftig med færre sjuke enn sist vinter, seier Hauge.