Suksessrik sportsskyttar frå Eid

EID (NRK): 19 år gamle Regine Nesheim frå Eid har allereie hevda seg heilt i toppen i sportsskyting. Denne helga konkurrerer ho i den prestisjetunge Swedish Cup.

Portrett av Regine Nesheim og rifla

NØGD: Regine Nesheim er svært nøgd med suksessen ho har hatt så langt i idretten sin.

– Det er debuten som seniorskyttar, så meg har eigentleg ikkje så høge forventningar sa Nesheim før tevlinga i Sverige hadde starta.

På dag to av konkurransen vart ho nummer to av 61 skyttarar, noko som må seiast å vere eit godt resultat, med tanke på hennar audmjuke innstilling.

– Det har ikkje blitt så veldig mykje trening no i jula, så forma er eigentleg heilt grei, sa ho tidlegare denne veka.

Nesheim har allereie hevda seg heilt i toppen av skytesporten, mellom anna med gull i junior-VM i Tyskland i fjor. Neste høgdepunkt er EM, som vil vere i slutten av februar.

Øver heime i verkstaden til faren

Nesheim har skote både med grovkaliber og finkaliber, men dei siste åra har ho satsa for fult på sistnemnde. Øvingslokale har ho heime der ho bur i lag med foreldra. faren har nemleg ein stor, gamal industriverkstad som fungerer fint til å øve i. Der har ho bane på ti meter til å trene på.

– Og her er det fleire som trenar. Heile Eidsbygda skyttarlag og Haugen skyttarlag brukar denne verkstaden fleire gonger i veka, fortel Nesheim.

Regine Nesheim med rifle

SATSAR PÅ FINKALIBER: Regine Nesheim har skote mykje både med finkaliber og grovkaliber, men dei siste åra har ho satsa på førstnemnde.

Foto: Harald Kolseth / NRK

Det først dei siste åra ho verkeleg har satsa på idretten, men skytinga har vore med ho lenge.

– Eg byrja med skyting allereie då eg var 7–8 år gamal. Då eg skulle på vidaregåande valde eg å flytte til Lillehammer for å gå på Norsk toppidrettsgymnas. Det gav meg høve til å satse endå meir på sporten, seier eidaren.

Kva er det som driv deg?

– Skytinga har betydd veldig mykje for meg. Men all den fritida og reisinga eg har brukt på det, så har det jo eigentleg berre blitt ein del av meg.