STX Florø seld til Westcon

STX Europe har selt både verftsanlegget i Florø og STX Norway Design Florø AS til Westcon Group AS . Westcon Group har base i Ølensvåg i Nord-Rogaland og driv mellom anna med nybygg av skip og reparasjonar av skip og oljeriggar.

I byrjinga av desember skreiv Westcon Group ein intensjonsavtale med STX Europe om kjøp av verftet.

• LES OGSÅ: Westcon vil overta STX-verft i Florø

STX Norway Florø hadde ved utgangen av tredje kvartal i 2012 ein ordrereserve på 59 millionar, det meste av dette handlar om ferdiggjering av røyrleggingsfartøyet «Deep Energy».

– Positivt med norske eigarar

Administrerande direktør Gustav Johan Nydal i STX Norway Florø AS seier til NRK at oppkjøpet er positivt for verftet.

– Spesielt fordi vi no får norske eigarar som ser mogelegheitene i Florø og som ynskjer å satse i Florø. Det er veldig positivt. Westcon er ein stor aktør på riggmarknaden, og det vil hjelpe oss til å kome lettare inn på marknaden med dei som eigarar.

Men Nydal ser ikkje for seg at verftet i Florø berre skal konsentrere seg om riggreparasjonar.

– Vi ser for oss ei kombinasjonsdrift framover. Westcom driv og med skipsreparasjonar og skipsbygging, og eg ser for meg at vi kan trekkje vekslar av kvarandre på desse tre områda. Men skipsbygging er ikkje primær strategi framover.

Verftet i Florø vart etablert i 1949 som Ankerløkken Verft og har sidan hatt mange eigarar og namn. Les meir om historia til verftet i artikkelen Ankerløkken-eventyret i Fylkesleksikonet.

LES OGSÅ: Lang transport gjev nytt liv i Florø

– Vil styrke Westcon

I ei pressemelding skriv Westcon Group at selskapet ventar positive effektar av kjøpet.

– Vi er stolte av å kunne ønskje våre kundar og alle som jobbar for Westcon, som no inkluderer også våre nye kollegaer i Florø, eit godt nytt år med denne spennande avtalen, seier viseadministrerande direktør Arne Birkeland.

Han seier at oppkjøpet vil styrke Westcon sin posisjon som ein leiande tilbydar av verftstenester i Nordsjøen.

– Tilgang til den høge kompetansen i selskapa vi kjøper, i tillegg til ei større dokk, eit moderne anlegg og ein attraktiv geografisk plassering vil styrke Westcon sin posisjon i marknaden, seier Birkeland.