Eit fleirtal i planutvalet i Florø vedtok tysdag at planen om utviding av oljebasen skal sendast ut på høyring med den løysinga Fjordbase ønskjer. Det er å utvide basen vidare vestover mot sentrum.
Naboane til basen og mindretalet i planutvalet vil ha baseutvidinga austover vekk frå byen.
– Der borte bur det masse folk, og dei folka vil få sine eigedomsverdiar redusert, meiner gruppeleiar for Venstre i Flora bystyre, Odd Bowim.
Han tykkjer det er «drøyt» at Fjordbase og no også fleirtalet i planutvalet vil bruke området vestover mot Florø by til baseutviding.
– Ei utviding austover vil skåne dei sentrumsnære områda på ein mykje betre måte, meiner Bowim.
Leiar for plan- og miljøutvalet i Flora, Hanne Husebø Kristensen (H), meiner at det er rett å sende planforslaget ut på høyring no.
– For oss har Fjordbase synleggjort godt nok at dei har behov for det arealet vestover, og har kome med eit planforslag som vi meiner er bra nok til at det bør ut på høyring, seier Kristensen til NRK.
Fleire av naboane til den raskt veksande oljebaseverksemda i Florø var tilstades under møtet i plan- og miljøutvalet.