E-verkssjef: – Ein er ikkje trygg mot lynnedslag, sjølv nede i dalføra

– Ein er ikkje trygg sjølv om ein er nede i eit dalføre. Tidlegare sa ein gjerne at viss ein ikkje var på dei høgste toppane eller var nær høge master, så var ikkje dette noko problem. Men vi ser at lynet kan slå ned overalt. Folk bør vise respekt for denne faren, seier Oddvar Hatlem som er fungerande nettsjef i Sunnfjord Energi.

• LES OGSÅ: Mor og son såg lynet slå ned utanfor stoveglaset: – Det var eit sjokk
• LES OGSÅ: Fleire hus i Førde skadde av lynnedslag

Hektisk natt etter mange lynnedslag

Hatlem og mannskapa har hatt ei travel natt etter eit utal lynnedslag måndag kveld. Verst var situasjonen i Førde der eit lynet slo ned i bustadområdet Vieåsen. 13 bustader har fått skader.

– Vi har hatt lyn i heile området frå yst i Solund til langt inn i landet i Jølster, mykje i Dale og Hyllestad-området. Vi takla det rimeleg bra, heilt til vi fekk den veldige smellen i Vieåsen i Førde. Då datt mykje ut for oss.

– Vi klarte å få inn att dei fleste abonnentane etter kvart. Nett no er det berre dei 13 leilegheitene som vart skadde i Vieåsen som er ute. Der slo lynet ned i ei furu og flytta fleire kubikk stein og jord omtrent inn i ei leilegheit. Der er det store materielle skader.

• Sjå detaljert vêrvarsel for ditt nærområde på Yr.no
• Uvêret skaper vanskar i trafikken tysdag. Hald deg oppdatert med NRK.no/trafikk

Lynet følgde jordingsanlegga på husa

Hatlem er glad for at det berre er snakk om materielle skader.

– Den utladinga som var der oppe, var enorm. Lynet slo ned i furua og har truleg følgt jordingsanlegg inn i husa. Fleire stader var det slått ut betong av grunnmurane på grunn av jernet i muren. Faren er viss du er nær nok og får straumgjennomgang i deg sjølv. Då kan det vere livstrugande. Lykka var at ingen fekk vesentleg straum i seg. Etter det vi veit vart to personar sendt til observasjon.

• Sjå Sintef Energi sin animasjon over gårsdagens mange lynnedslag her

Lite å stille opp med

Etter romjulsorkanen Dagmar i 2011 har kraftselskapa gjort mykje for å vere betre budde når uvêret råkar. Men lynnedslag kan ein ikkje ruste seg for.

– Då blir vi små. Vi er rigga for å klare mykje, men dei kreftene der klarer vi ikkje å temje. Då må vi berre halde oss unna til det har gitt seg. Lykka vår var at trafoane våre heldt stand, og for vår del var det var berre nokre lågspentkablar som var skada.

I morgontimane tysdag er det, forutan dei lynråka bustadane i Vieåsen i Førde, berre 15 abonnentar i Sunnfjord Energi sitt dekningsområde som er utan straum.