Står føre store utskiftingar i leiinga neste år - samtidig kan skulen bli føreslått nedlagd

Åremålet til Løkeland og 14 andre i leiarskapen ved Høgskulen i Sogn og Fjordane går ut i 2015.

Omtrent samtidig legg regjeringa fram ei stortingsmelding som kan kome til å føreslå nedleggingar av høgskular.

Dette er eit scenario vi har i bakhovudet, seier styreleiar ved høgskulen, Heidi-Kathrin Osland.

– Det er viktig at vi får med nokre erfarne folk på laget vidare, men samtidig er det alltid lurt med ei viss utskifting slik at vi får inn impulsar utanfrå. Men dette er heilt klart ei problemstilling som er med oss framover no, seier ho.

• LES OGSÅ: Meiner samarbeid skal sikre skulen

– Avgjerande med kontinuitet

Høgskulen i Sogn og Fjordane går inn i ei tid med store endringar i leiinga.

Neste år går nemleg åremålet til både rektor Åse Løkeland og 14 andre viserektorar, dekanar og instituttleiarar ut. Løkeland har leia høgskulen i fylket i to fireårsperiodar, og må slutte. Kor mange av dei andre leiarane som gir seg, er enno uvisst.

Men styret har nyleg lagt ein plan for å erstatte dei som sluttar. Dette er ein fornuftig plan, meiner hovudtillitsvald for Forskerforbundet ved høgskulen, Frode Fretland.

Han meiner det å sikre kontinuitet i leiinga blir viktig, og er glad fleire blir tekne med i arbeidet med å finne erstattarane.

– Eg trur det blir heilt avgjerande, og difor må både representantar frå studentane, fagforeiningane, dei tilsette og leiarskapen vere med i arbeidet. Saman vil dei heilt sikkert vite om gode kandidatar til jobbane, seier han.

• LES OGSÅ: Fråflytting tappar fylket for arbeidskraft
• LES OGSÅ: Skeptisk til fleire studieplassar

(Artikkelen held fram under biletet)

Fryktar ikkje styringsvakuum

Samtidig med at rektor og andre leiarar kjem til å slutte, blir det også oppnemnd nytt styre for Høgskulen i Sogn og Fjordane neste år.

Regjeringa har varsla ein omfattande gjennomgang av høgare utdanning i Norge, og opnar mellom anna for å sjå på talet regionale høgskular rundt om kring i landet.

Stortingsmeldinga om dette vil kome om lag samtidig som dei store endringane i leiinga ved Høgskulen i Sogn og Fjordane.

Om det skulle oppstå kamp om framtida til høgskulen, er styreleiar Heidi-Kathrin Osland ikkje redd for eit styringsvakuum.

– Eg er ikkje uroa for det. Men samtidig må vi sikre oss at dei som kjem inn kan vere med å påverke det politiske landskapet, slik vi har klart til no, seier ho.

• LES OGSÅ: – Dramatisk om lærarutdanninga forsvinn frå høgskulen i Sogndal
• LES OGSÅ: «Vi treng mange kloke hovud og flinke hender i åra framover»