Temperaturoversikta etter midnatt viser at det er målt 14,3 grader i Valldal i Møre og Romsdal, 14,2 grader ved Florida målestasjon i Bergen og 13,9 grader ved Kråkenes fyr i Sogn og Fjordane.
Samtidig var Suolovuopi i Finnmark kaldaste stad i landet i dag tidleg. 28,5 blå grader viste målestokken der.
Men særleg uvanleg er ikkje den store temperaturforskjellen, fortel statsmeteorolog Lars Andreas Selberg.
– Det er noko som skjer ganske ofte. Nord-Noreg har ein tendens til å bli innhylla i kald, arktisk luft, mens vi lenger sør får lågtrykk som dreg varm luft sørfrå opp til oss, seier han.
Ny rekord i Bergen
Ei vindretning frå søraust gjorde at det var venta uvanleg høge temperaturar på Vestlandet.
– Eg vil seie det er til ein viss grad uvanleg, samtidig har det skjedd før, seier Selberg.
14,2 varmegrader ved Florida målestasjon i Bergen er ny desemberrekord. Den førre rekorden var på 14,0 grader og blei sett i 1984.
Grøn jul mange stader
Varmerekorden for desember står seg likevel enno. Den blei sett 1. desember 1998. Då var det 18,3 varmegrader på Sunndalsøra i Møre og Romsdal.
I Fjærland blei det målt 16,5 plussgrader i desember 1984.
Mange drøymer om kvit jul, men det kan sjå ut til at jula heller blir grøn mange stader
– Skal det vere håp om skikkeleg kvit og og fin kul, er sannsynet høgast på indre Austlandet og i fjellet for Sør-Noreg. På kysten på Vestlandet ser det ikkje ut til at det blir snø, seier Selberg.
– I Finnmark og Troms er sjølvsagt også sannsynet mykje større for kvit jul, legg han til.