– Eg var heldig og det var dei i bilen framfor også. Veldig, heldig, Seier Geir Gjertsen. Han var berre nokre meter frå å verte treft av steinblokken som brasa ned mellom breimsfjelltunnelane måndag kveld.
Det var Bergens Tidende som først omtalte opplevingane til vogntogsjåføren.
Hamna mellom to bilar
På ein langtransport-tur mellom Kristiansund og Bergen vart Gjertsen vitne til ein svært skremmande oppleving.
– Like før Breimsfjell 2-tunnelen hadde eg ein personbil framfor meg. Så såg eg opp mot fjellsida og der kom ein ganske stor steinblokk susande nedover.
Gjertsen fortel at han hadde ein personbil framfor seg på vegen då steinen kom dalande.
– Steinen trefte i motgåande køyrebane mellom meg og den andre bilen, før den trilla ut av vegbana. Den var vel ein meter frå vogntoget, seier han.
Skaka
Gjertsen, som sjølv har vore vogntogsjåfør i 39 år, opplevde hendinga som ubehageleg.
– Eg har sett mykje rart på vegen opp gjennom åra, men dette sette ein støkk i meg, seier han.
No håpar han myndigheitene tek tak for å betre køyreforholda langs norske vegar, ettersom at klimaet vert tøffare.
– Nokon må ta ansvar og betre vegane våre. For ein som køyrer 100 000 km i året, må eg sei at eg ikkje liker denne utviklinga.