– Han er flink og eg er mektig stolt av Jørn. Sjølv om han ikkje skulle kome til finalen, er han likevel ein stor vinnar som eg har stor respekt for. Han er ein flott representant for slekta, seier Magna Kvalheim.
Nordfjordhallen var fylt til randa med folk som ville vere med å heie fram Jørn Trollebø Kvalheim.
- LES OGSÅ: Frå dusj-song til Idol-finale med fleire hundre tusen sjåarar
- LES OGSÅ: Idol-håpet lever vidare for Jørn
Stemte flittig
Hallen var pynta med småbord og levande lys. Ved eit av borda sat 82 år gamle Magna Kvalheim og andre slektningar benka, og venta på at Jørn skulle dukke opp i TV-ruta.
Etter han hadde sunge, sat heile salen og stemte. Magna sat flittig og sende meldingar. Kor mange ville ho ikkje fortelje.
– Men det vart ein del i kveld også, kunne ho røpe med glimt i augo.
(Artikkelen held fram under biletet)
Jørn hamna i faresona, men er framleis med. Då det vart klart braut hallen ut i trampeklapp. Farmora seier det er hard trening som gjer at Jørn Trollebø Kvalheim framleis er med i kampen om Idol-trona.
– Ingen av oss i familien er fødde musikalske. Dette med musikk og song er noko kvar enkelt av oss har lært oss etter kvart, seier farmora til Jørn.
Eigenkomponerte songar neste fredag
Og kor mykje barnebarnet har lært seg, vil alle få sjå neste fredag. Då skal dei fem deltakarane synge eigenkomponerte songar.
– No vert det endå meir spanande neste fredag, seier Magna Kvalheim, som feira med eit stykke blautkake.
Ved eit tidlegare høve var ho til stades i Oslo og såg sitt kjære barnebarn synge. Planen for neste fredag er ikkje kjent.
Men ein ting er sikkert, det skal stemmast flittig også då.