– Då Grete Faremo ville legge ned 110-sentralen sytte eg for å lage so mykje bråk og rabalder at det vart lagt på is, seier Liv Signe Navarsete (Sp) når ho møter Høgre og Venstre til debatt.
I går la Regjeringa og Venstre fram sitt forslag til politireform. Sogn og Fjordane politidistrikt blir slått saman med Hordaland, og ei rekkje lensmannskontor blir truleg lagde ned.
- Høyr heile debatten lenger nede
Sterkt ueinige om resultatet av reforma
I dag tidleg høyrde vi stortingsrepresentantane Bjørn Lødemel (H) og Sveinung Rotevatn (V) seie at reforma er til det beste for Sogn og Fjordane og landet. Navarsete og Senterpartiet meiner det blir dårlegare polititenester og sentralisering.
– Ein burde forvente at Stortingsrepresentantar frå Sogn og Fjordane tek eit oppgjer med sentraliseringsiveren i leiinga i partia og i regjeringa. Vi hadde og sentraliseringsivrige folk i den raudgrøne regjeringa, seier Navarsete.
– Vi i Sogn og Fjordane Høgre jobba innanfor partiet for å behalde Sogn og Fjordane som eitt politidistrikt. Vi kom ikkje i mål, seier Lødemel, som framleis står på at det er ei god reform.
– Det viktigaste av alt er å utvikle eit nærpoliti som folk ute i bygdene og kommunane vil sjå nytte av. Då treng vi folk på lågaste nivå, og det er det denne reforma dreier seg om, meir enn lokalisering av eit politidistrikt, seier han.
Ueinig med eigen stortingsrepresentant
Stortingsrepresentant Sveinung Rotevatn kunne ikkje stille til debatt i dag. Partifelle og fylkesleiar i Venstre, Gunhild Berge Stang, støttar hovudintensjonane med reforma, men er sterkt ueinig med stortingsrepresentanten sin om framtida til politidistriktet.
– Vi har eit velfungerande politidistrikt i Sogn og Fjordane, som skal slåast saman med eit mildt sagt ikkje så velfungerande politidistrikt i Hordaland. Det er det eg er mest kritisk til, seier Stang.
Meir om saka og debatt
- Les også: Sogn og Fjordane og Hordaland blir eitt distrikt
- Les også: Polititoppar om reforma: Ei sentraliseringsreform
- Les også: – Samanslåinga er eit paradoks i lys av Monika-saka
- Les også: Forsvarar politireforma
- Les også: Slik blir nye Politi-Noreg
- Les også: To av tre politimeistrar likar det nye kartet