Den 420 kilovolts kraftlinja skal gå mellom Fardal og Ørskog og vil mellom anna styrke leveringskapasiteten for straum i Midt-Norge.
Protestane mot linja har vore massive, men departementet bestemte seg i fjor haust for å starte opp anleggsarbeidet på delstrekningane Fardal-Mogskog og Ørsta-Hundvikfjorden.
Skogrydding ved Moskog i Førde er første steg, og åtte skogsarbeidarane starta onsdag føremiddag maskinene.
– Vi begynner med hogst, så støyper vi fundament. Deretter blir det oppsetjing av master og til slutt skal vi trekkje kraftlinjer, fortel prosjektleiar Ove Brattberg i Statnett til NRK.no.
- LES OGSÅ:
Svært omstridd
Langs heile kraftlinjetraseen har både innbyggjarane, grunneigarar og politikarar teke til motmæle. Mange har vore kritiske til utbygginga, mellom anna fryktar folk negative konsekvensar i form av stråling og at dei store mastene vil øydeleggje naturen.
På delar av strekninga har fleire også kravd sjøkabel, men i november i fjor slo dåverande olje- og energiminister Terje Riis-Johansen fast at det ikkje blir aktuelt med noko sjøkabel.
Grunngjevinga var at dette ville bli langt dyrare og samtidig ville gjere det umogleg for småkraftprodusentane å få til påkoplingspunkt til linja.
- LES OGSÅ:
- LES OGSÅ: –
Minst mogleg synleg
Den 28 mil lange kraftlinja er planlagt ferdig i 2015. På Moskog har ein no starta med skogsarbeidet, men det vil ta tid. Det er nær 50 mål med skog som skal vekk for å rydde plass til ein ny transformatorstasjon.
Brattberg seier det ikkje berre er å dure på når dei skal rydde linjetraseen.
– Etter krava må all vegetasjon som kan stå att under leidningen, stå att. Dette er fordi leidningstraseen ikkje skal bli så dominerande i terrenget, seier Brattberg.
Fryktar ikkje aksjonistar
Ei 420 kilovolts kraftlinje vil uansett bli synleg. I Hardanger har dei starta bygging av ei liknande kraftlinje mellom Sima og Samnanger. Her har aksjonistane ved fleire høve sett ein stoppar for arbeidarane som jobbar med linja.
- LES OGSÅ:
- LES OGSÅ:
Sjølv om folk har protestert mot linja også i Sogn og Fjordane, trur ikkje Brattberg at dei skal oppleve det same her.
– Vi har ikkje fått nokre slike indikasjonar her. Eg trur folk har meir forståing for dette her. Dei ser at linja har ein lokal nytteverdi når den legg til rette for fornybar energi, det har det ikkje gjort i Hardanger, seier Brattberg.
Det er endå ikkje bestemt kva trase linja skal gå gjennom Naustdal, og Statnett håpar å få til eit endeleg vedtak før jul.
- LES OGSÅ:
NVE held fast ved at kraftlinja skal gå over Kvamme i Angedalen og Grimset i Naustdal, det skriv avisa Firda onsdag. NVE meiner dette linjevalet er det beste fordi det er kortare, mindre synleg og vil skåne mykje urørd natur.
Motstandarane som likar dårleg at kraftlinja skal gå nær busetnadene på Kvamme og Grimset må no setje sin lit til at Olje- og energidepartementet går i mot NVE og endrar trasevalet.