Hopp til innhold

Stadig fleire låner stadig meir pengar i sparebanken

For tiande året på rad har Sparebanken Sogn og Fjordane vekst på privatlånmarknaden og resultatet for første halvår er 30 millionar betre enn i fjor. Trass i at ni kontor er nedlagt.

Trond Teigene

Administrerande direktør, Trond Teigene, i Sparebanken Sogn og Fjordane.

Foto: Brit Jorunn Svanes / NRK

– Det er ei veldig god utvikling og ein sterk vekst. Det er viktig for oss å vinna kampen om kundane og neste halvparten av alle lånekundane har låna sine hjå oss, seier administrerande direktør Trond Teigene, i Sparebanken Sogn og Fjordane.

I dag presenterte dei halvtårsresultatet. Det viste at 47,3 prosent av alle private lånetakarar i Sogn og Fjordane har lånet sitt i banken og den samla lånesummen har auka med over ein milliard kroner.

Ni færre

I fjor varsla banken at dei skulle legge ned ni kontor i løpet av 2017. Det har dei no gjort, og Teigene seier nedleggingane stort sett har gått bra.

– Vi har lagt ned ni kontor dette halvåret og vi er inne i ein tøff periode, men dei tilsette har levert veldig bra. Det har gått bra, men sjølvsagt har det vore reaksjonar der vi har lagt ned filialar, seier banksjefen.

Dei ni kontora som er lagt ned er i Askvoll, Leirvik, Hornindal, Sande, Naustdal, Skei, Balestrand, Leikanger og Svelgen. Banken har framleis 13 kontor i fylket, samt eitt i Bergen. I tillegg er banken til stades med 23 Bank i Butikk.

30 millionar

I første halvår kan dei vise til eit resultat før skatt 239 millionar. Det er 30 millionar betre enn same tid i fjor.

– Den gode veksten og det gode resultatet gir banken kraft til å utvikle seg vidare, noko som er svært viktig for å behalde Sparebanken Sogn og Fjordane som ein sterk, sjølvstendig bank med hovudkontor i Sogn og Fjordane, seier Trond Teigene