Dei fleste snakkar for tida om all snøen som har kome. I skianlegget i Jølster har dei for tida mest snø i heile verda, og på vegen mellom Veitastrond og Hafslo har bygda blitt isolert to gonger på ei veke på grunn av snøras.
Men på kysten ved Selje har våren begynt å vise seg. Snøen er borte og golfentusiastane kan endeleg gjere det dei likar best.
Har plussgrader og sol
Toril Bortne seier dei har fantastiske forhold på golfbana i Selje.
– Vi har ein bane som er heilt grønn. Det er gode forhold, og vi har planar om å ha ei miniturnering på søndag. Alle som vil kan melde seg på, seier Bortne til NRK.no.
– Det er godt å sjå våren, men ein må vere på solsida. Golfbana er skjerma for snøen og vi har tre plussgrader og sol, seier Bortne.
Medan innbyggjarane i Selje kan sjå grønt gras, er frustrasjonen over store snømegder stor andre stader i fylket. I Fjærland er Jo Marius Bøyum så lei snøen at han gir den bort gratis på finn.no.
(Artikkelen held fram under biletet)
– Veit ikkje om andre stader
Toril Bortne i Selje seier ho ikkje veit om andre stader der ein kan spele golf så tidleg på året.
– Så dei som vil spele golf er velkomne til Selje. Så lenge det ikkje er frost i marka, så er forholda kjempe flotte, seier ho.