Det var medan Brann jakta utlikning heilt på slutten av kampen på Fosshaugane, at Carl-Erik Torp plutseleg vart liggjande igjen på grasmatta.
Då dei nærmaste spelarane kom til, vart det brått hektisk for å få tak i helsepersonell.
Brann-spelaren fekk behandling på staden, og vart frakta ut av bana på båre.
– Det var ei ekkel oppleving. Vi fekk jo sjokk vi andre også, seier Sogndal-spelar Ulrik Flo.
Carl-Erik Torp vart henta med luftambulanse til Haukeland etter kampslutt. Ei stund seinare kom Brann med informasjon om kva som hadde skjedd.
– No er han stabil, og har det bra. Han er i gode hender, opplyser klubblege Atle Kjellsen til NRK.no.
– Kor lenge var Torp medvitslaus?
– Det er vanskeleg å seie. Vi brukte hjartestartar og hjarte- og lungeredning både på bana og i garderoben, seier Kjellsen.
Etter det NRK forstår skal tilstanden til den skadde Brann-spelaren vere stabil. Torp skal naturleg nok vere medteken etter episoden.
VART HENTA: Helikopteret frå luftambulansen var på plass og fekk frakta Torp til Haukeland i Bergen.
Foto: Steinar Lote / NRK
