Speglar bygdekultur med dans på lokalet

– Eg har vekse opp med dans på lokalet på samfunnshuset i Holmedal. Det var plassen å vere. Der skjedde alt, så det måtte ein få med seg. Elles hadde du ikkje noko å snakke om i veka, ler Idun Losnegård.

Losnegård ein av skodespelarane som saman med Sogn og Fjordane Teater skal reise rundt til grendahus med stykket Dans på lokalet. Stykket skal hylle både grendahusa og bygdedansen. Sjølv hentar Losnegård mykje inspirasjon frå der ho sjølv vaks opp.

– Eg er godt forplanta i bygdekulturen på alle vis. Eg har prøvd å rømme vekk frå det, men no kjem eg tilbake og er stolt av den.

No tek stykket ho tilbake der minna er mange og historia sit i veggane – Holmedal Bygdehus.

– Eg gleda meg veldig, men er litt nervøs. Der skal eg komme tilbake og ta huset på ein måte, seier Losnegård.

• Les også: Charlotte har laga eit rom av eventyr

Både storstove og hjørnestein

Med song og dans skal Dans på lokalet ta deg tilbake til ei litt svunnen tid spegla over fem tiår.

– Det var på høg tid vi gjorde stas på desse husa. Eg ser på det som starten på vår kulturelle infrastruktur. Dette var storstova og hjørnesteinen i samfunnet, seier regissør Arne Fagerholt.

Frå 1945 og etterkrigstida fram til 1987 skal stykket spegle noko av den historia som framleis sit i veggane. Alt frå den gryande kjærleiken til den klossete dansen.

– Det var ein viktig samlingsstad der ein kunne leve livet med alt av høgdepunkt og triste nedturar, seier skodespelar Jørn-Bjørn Fuller-Gee.

For å førebu seg på best mogleg måte var ein ekte grendafest det mest naturlege for skodespelarane.

– Vi har vore på bygdefest i Angedalen to gonger der vi lærte å danse sving. Det var veldig kjekt, så no tenkjer vi at befolkninga elles i landet går glipp av noko, gliser skodespelar Martha Standal.

• Les også: Heilt utmatta av å sjå si eiga bok som teater

Der livets dans vart dansa

Alt frå dansefestar, folkemøte og basarar tok stad i grendahusa, der livets dans vart dansa. Det var der ein kunne sjå og bli sett. No er det Idun Losnegård alle i Holmedal skal sjå på i grendahuset.

– Det er ikkje så lett å bli profet i eiga bygd. Eg vil jo kjenne alle som kjem for å sjå på. Det er ganske skummelt når ein spelar teater, seier Losnegård.

Losnegård veit kva som ventar når ho treff på kjentfolk på bygdahuset i Holmedal.

– Dei kjem til å kjefte på meg. Eg var på ein konsert i Holmedal der eg gjekk med bare armar. No må du kle på deg Idun, sa dei. Så du kan ikkje gøyme deg uansett, ler ho.