Skuldar Navarsete-kritikarar for å spreie løgn

I ein epost skuldar Vigdenes Navarsete for mellom anna båssetting, mistenkeleggjering og paranoia.

– Det er trist å lese. Når Vigdenes i ein hånleg tone skriv om fleire krevjande situasjonar for partiet som skjedde før Liv Signe vart attvald som leiar i 2013, og brukar dette som argument for at ho burde gå av, seier Beate Marie Dahl Eide.

Ba Navarsete om å gå

Den interne striden i Senterpartiet nådde nye høgder etter at Ivar Vigdenes sin epost til Navarsete frå desember i fjor vart offentleggjort i går.

Ivar Vigdenes er no ordførar i Stjørdal, men var i ein lengre periode politisk rådgjevar for Ola Borten Moe då han var olje- og energiminister. E-posten frå desember i fjor er eit samanhengande angrep på Navarsete, der ho blir skulda for mellom anna båssetting, mistenkeleggjering og paranoia.

• LES OGSÅ: Ba Navarsete direkte om å trekke seg

E-posten vart avslutta med at Vigdenes oppmoda Navarsete på det mest innstendige om å gå av med umiddelbar verknad. Dahl Eide er opprørt over innhaldet i eposten

• LES OGSÅ: Senterpartiet legger ned Facebook-gruppe etter personangrep
• LES OGSÅ: Lundteigen uenig med ledelsen: – Svært uklokt å stenge debattforum

– Hadde blitt ro, om Videnes hadde rett

– Dersom det Vigdenes skriv var rett, så hadde det blitt ro og harmoni i partiet då Liv Signe varsla sin avgang. Det motsette har skjedd og vi har ein svært krevjande situasjon, der konflikten rundt Ola Borten Moe dominerer.

I staden for bitande kritikk, meiner Dahl Eide at Navarsete fortener stor ros for innsatsen ho har gjort som rikspolitikar, partileiar og statsråd.

– Eg meiner Liv Signe har vore ein ærleg, tydeleg og jordnær leiar for Senterpartiet. Ho er den partileiaren som har fått gjennomført mest Senterparti-politikk, og eg meiner det kjem stå som ein bauta etter henne når dette er over.

– Men mykje av det Vigdenes skriv, den raude tråden, er at Navarsete ikkje toler kritiske merknader og andre meiningar enn sine eigne. Har han ikkje litt rett i det?

– Eg synest det er synd at deler av partiet ikkje har akseptert at vi har ein demokratisk vald leiar som heiter Liv Signe Navarsete. Ho vart attvald på landsmøtet i 2013. I den situasjonen som partiet har vore i, skulle heile partiet ha samla seg om den valde leiaren og spelt ho god, i staden for å sende slike brev og e-postar som er blitt gjort, seier Sp-toppen frå Telemark.

Håpar Borten Moe tek ansvar

Dahl Eide, som opphavleg kjem frå Nordfjordeid i Sogn og Fjordane, er for tida fylkestingsmedlem i Telemark. Ho er samrøystes innstilt til å ta over som leiar i Senterkvinnene nasjonalt, etter Bjørg Berheim frå Jølster som går av på årsmøtet i byrjinga av april.

Den påtroppande Senterkvinne-leiaren håpar Ola Borten Mo trekkjer kandidaturet sitt, noko som må til for å få slutt på Striden i Senterpartiet.

• LES OGSÅ: Striden om Ola Borten Moe splitter Sp
• LES OGSÅ: – Jeg stiller til valg som nestleder uansett
• LES OGSÅ: Her er Sp-dama som utfordrer Ola Borten Moe til tvekamp

– Liv Signe har tatt sin del av ansvaret ved å trekkje seg som partileiar, og eg meiner Ola Borten Moe også burde tatt sin del av ansvaret og vore med å bidrege til ei løysing som kunne skape ro.

– Eg synest det er alvorleg trist at vi er komne i den situasjonen vi er, og eg er djupt usamd i at det er Liv Signe Navarsete som skal bere det heile og fulle ansvaret, seier Dahl Eide.

Liv Signe Navarsete ønskjer ikkje å kommentere saka.
Ivar Vigdenes har ikkje vore tilgjengeleg for kommentar.