Solveig skal leie Klassequizen

Den store landsfinalen med 19 fylkesvinnarar skal gå på NRK1 laurdag 4. mai i beste sendetid. Programmet skal vare i ein og ein halv time. Solveig gler seg som ein unge til oppgåva.

– Dette blir spennande og kjempemoro. Tenk å ha 57 tenåringar i studio på ein gong.

• LES OGSÅ: Svanger med bok, barn og Barne-TV

Fylkesfinale 21. februar

Det heile startar i lokalseningane til NRK på radio 12. november. Alle ungdomsskulane i landet er inviterte til å melde på eit lag med tre elevar frå 10. klasse.

(Artikkelen held fram under biletet).

Til saman 316 skular har meldt på lag. I Sogn og Fjordane er 27 av 46 ungdomsskular klare til dyst. Dei fire beste laga går til semifinalar, og til slutt skal fylkesvinnaren kårast i ein finale 21. februar.

Laget som vinn der får 5000 kroner til klassekassa si, og får vere med i landsfinalen i Oslo 4. mai. NRK spanderer reise og opphald på dei.

Ein reporter frå kvart distriktskontor dreg to dagar i veka ut og stiller spørsmål til lag frå to skular kvar dag. Tre firedelar av spørsmåla er laga sentralt. Dei same spørsmåla blir stilte 19 ulike stader i landet samstundes. I tillegg blir det laga lokale spørsmål.

(Artikkelen held fram under biletet).

I Sogn og Fjordane er det Erlend Blaalid Oldeide som har teke på seg oppgåva med å reise frå skule til skule og få quizen på lufta. Det blir travelt, men han gler seg til å snakke med 10. klassingane og teste kunnskapane deira.

– Må øve meg på å vere streng

For Solveig Hareide blir oppgåva no å førebu seg på den store tv-sende finalen i Oslo. Ho ser at dette blir nokså ulikt det ho har gjort til no, som t.d. å vere progamleiar for Newton og Kosinus.

– Eg må øve meg på å gå i høghæla sko, eg har alt teke i bruk sko med halvhøge hælar, og så blir det vel kjole med glitter og stas. Men det viktigaste er nok å førebu meg på å stille spørsmål og skilje mellom rette og nesten rette svar. Eg har fått beskjed om å vere streng, og det må eg øve meg på.

• LES OGSÅ: Tallspisende drage lærer barn matte

(Artikkelen held fram under biletet).

Klassequizen har vore arrangert to år av NRK Sørlandet, men no skal heile landet vere med.

• LES OGSÅ: Arendal International School vant klassequizen

27 skular frå Sogn og Fjordane

Her er dei 27 skulane frå Sogn og Fjordane som ha meldt på lag:

• Våge skule, Fjaler
• Askvoll skule, Askvoll
• Olden skule, Stryn
• Stryn ungdomsskule, Stryn
• Vassenden skule, Jølster
• Kvåle skule, Sogndal
• Farnes skule, Årdal
• Aurland barne- og ungdomsskule, Aurland
• Sande skule, Gaular
• Viksdalen skule, Gaular
• Byrknes skule, Gulen
• Dalsøyra skule, Gulen
• Høyanger skule, Høyanger
• Sagatun skule, Balestrand
• Feios skule, Vik
• Flatbygdi skule, Vik
• Førde ungdomsskule, Førde
• Halbrend skule, Førde
• Naustdal barne- og ungdomsskule, Naustdal
• Hyen skule, Gloppen
• Bulandet skule, Askvoll
• Davik skule, Bremanger
• Eid ungdomsskule, Eid
• Lavik skule, Høyanger
• Eivindvik skule, Gulen
• Selje skule, Selje
• Vågsøy ungdomsskule, Vågsøy.