– Sola var vel berre ute i ein halvtimes tid, men det var nok til at stemninga her i hamna steig fleire hakk, seier Ådne Matre Andersen.
Saman med brørne sine Odin og Sondre er han på Utkantfestivalen med ei 26 meter lang og seks meter brei skute som skil seg bra ut blant alle småbåtane i Skjerjehamn denne helga. Men masfjordingane veit å dele på goda.
– Det er greitt å ikkje opne heilt opp sidan denne båten er heimen til han som eig han, men stort sett får folk lov til å kome inn og feste med oss, seier Andersen.
- Er du på Utkant? Merk gjerne bileta dine med #nrksf på Instagram. Vi trekkjer ut tre personar som får ein DAB-radio kvar
Båtane er sentrum
Og det er i båtane festinga går føre seg på denne særeigne festivalen i Gulen. Det er nesten ikkje mogleg å kome fram med bil i festivalhelga, men over tre hundre båtar i ulike storleikar har funne vegen.
Med mellom anna internasjonale artistar som Bob Hund, Veronica Maggio og The Dandy Warhols har festivalen eit solid musikkopplegg på høgde med dei fleste andre festivalar, men det verkar likevel som om det er båtlivet som er det største trekkplasteret for dei vel tre tusen besøkjande.
- Les også:
– Vi er jo båtfolk her ute på kysten, så når vi kan kome på festival med båten er jo det heilt topp, seier brørne frå Masfjorden.
Tragisk dempar på idyllen
Konsertar og båtliv heilt ute i havgapet er sjølvsagt stor idyll, trass i alt regnvêret. Noko som derimot kanskje har sett ein dempar på idyllen i dag er det tragiske dødsfallet som skjedde i samband med festivalen i går kveld. Ein person som køyrde vekk ifrå festivalen i båt kolliderte med ein holme i fjorden, og døydde med ein gong.
- Les også: Ein omkom i båtulukke i Gulen
– Det er klart det set sitt preg på festivalen, det var ein person mange her ute kjende godt. Festivalen held likevel fram som normalt, og for mange av festivaldeltakarane vil det nok ikkje ha så mykje å seie, seier Nina Kirca som driv sjølve serveringshamna på Skjerjehamn.