Frå før er det kjent at Sogndal ynskjer å teste finske Hannu Patronen (27).
I tillegg er det no klart at også Fuad Hyseni (21) og Alexander Magnusson (22) får vise seg fram for Sogndal under turneringa.
– Det kjem tre stykke no til meisterskapen, i tillegg til dei vi har sjølve frå eiga gruppe og andre lag. Det skal bli artig å sjå dei i sving, seier assistenttrenar og spelarutviklar Håvard Flo.
Framleis aktuell
Fire forsvarar er vekke i høve til i fjor. Dermed ligg det i korta at sogndølane jaktar erstattarar for Mats Solheim, Even Hovland, Isak Scheel. Sjølv om kontrakten ikkje vart forlenga, er Vegar Gjermundstad framleis med og trenar med Sogndal.
- LES OGSÅ:
Både Patronen og Magnusson er forsvararar. Finnen er utan kontrakt med fjorårets trippelmeister i Sverige, Helsinborgs IF. Sportssjef Jesper Jansson seier til NRK.no at 27-åringen framleis trenar med klubben og at dei ynskjer han med vidare.
- LES OGSÅ:
Backen Magnusson er kontraktfesta til islandske Grindavik til oktober 2014. Han har tidlegare to kampar for det islandske U19-landslaget og vart i fjor kjent for eit spektakulært straffespark i den heimlege serien.
I tillegg er Sogndal på jakt etter ein ny spiss. Hyseni spelar for svenske Qviding, som rykte ned frå svensk 1. divisjon i fjor. Han vert rekna som ein rask bakromsspiss.
Resultat underordna
Flo seier resultat blir underordna når dei fredag møter Haugesund i første kamp i Vestlandshallen.
Søndag møter dei anten Brann eller Sandnes Ulf.
– Vi vil bruke tida framover på å fordele speletid på ein større tropp. Det har litt med belastninga på spelarane og at alle skal vere i action og spele. Det skal bli moro, seier Flo.