Sogndal blanda seg for alvor inn i botnstriden då dei tapte 0–1 på heimebane mot Bodø/Glimt i går.
Kampen kunne sendt Sogndal eit langt steg mot midten av tabellen, men i staden ligg dei no like over plassen som gir kvalifiseringsspel til 1. divisjon.
– Mykje stod på spel
Ulrik Flo bur seg på botnstrid framover. Han innrømmer glatt at Sogndal har hamna i trøbbel etter tapet mot Bodø/Glimt.
– Det kan sjå slik ut, men det er framleis elleve kampar igjen, så det er framleis tid til å snu det, seier han.
Men Flo legg ikkje skjul på at dette var ein kamp dei burde ha vunne.
– Ja, det var mykje som stod på spel i dag. Vi hadde moglegheit til å klatre frå botnstriden eller vere involverte for fullt, og det vart vel sistnemnde. Det er ikkje optimalt eller ønskjeleg.
(Artikkelen held fram under biletet)
– Vi får som fortent
Kaptein Rune Bolseth meiner dei berre har seg sjølv å takke for at den viktige kampen mot enda med tap.
Eit unøyaktig Sogndal-lag mista meir og meir kontroll utover i kampen.
– Vi får vel som fortent. Vi blir eigentleg berre dårlegare og dårlegare utover i kampen, og Bodø/Glimt hadde flest og størst sjansar. Det er vel ingenting å seie på at dei til slutt fekk vinnarmålet, seier Bolseth.
Sjølv om han meiner det er for tidleg å snakke om nedrykksstrid, vedgår han at Sogndal har ein jobb å gjere framover.
– Det er elleve kampar igjen, men prestasjonen i dag tilseier at det blir lite med poeng framover, så vi må rett og slett prestere betre.
Olsson fekk kritikk
Etter det sure tapet måtte Sogndal-trenar Jonas Olsson tole kritikk for at han venta lenge med å gjere spelarbyter.
Spesielt at publikumsfavoritten Tonny Brochmann måtte vente til eitt minutt før slutt før han kom inn, falt mange tungt for brystet – noko publikum på Fosshaugane gav høglydt uttrykk for.
– Det med byta er det lett å skrike og gape over, men vi har ganske mange spelarar med småproblem, og det er dumt å byte tredje bytet for tidleg og risikere å måtte spele med ein mann mindre dei siste ti-tolv minutta. Det har ein definitivt ikkje råd til.