– No gjeld det for sunnfjordingane og sogningane å halde dei unna, seier ei strålande nøgd Kjersti Sognnes i Tine meieri.
Som distriktssjef for Sunnfjord og Sogn har ho blitt vant til å sjå seg sått av nabodistriktet Nordfjord og Sunnmøre. Men i år var Sunnfjord og Sogn best på Vestlandet med ein elitemjølkprosent på heile 95,2.
– Elitemjølk er den beste mjølka som Tine produserer, so det blir stilt strenge krav til kvaliteten, seier Kjersti Sognnes.
Ingen snarvegar
Mjølkebonde Endre Råheim frå Viksdalen er ein av bøndene som har bidratt ekstra godt til det gode resultatet. Gjennom femten år har han, Helge Myklebust frå Vassenden og Ove Andre Humborstad frå Kjølsdalen levert utelukkande elitemjølk. For dette har dei blitt heidra med Sølvtina frå Tine meieri, den gjævaste utmerkinga ein mjølkebonde kan få.
– Det er jo kjekt å få ei anerkjenning for arbeidet vi har lagt ned for å få god kvalitet på mjølka, seier Endre Råheim.
Og det er mykje som skal vere på stell for å produsere elitemjølk samanhengande over tid.
– Det viktig å ha gode rutinar i alle ledd, frå hygiene og vasking, kvalitet på fôret og ikkje minst dyrevelferd, seier Endre Råheim.
– Det finst ingen snarvegar, det er heilskapen som må til.
Kjekt å slå nordfjordingane og sunnmøringane
Endre Råheim har fått med seg at sogningane og sunnfjordingane har slått nordfjordingane og sunnmøringane på kvalitet denne gongen, men vil ikkje rakke ned på nabodistriktet.
– Det er mange flinke mjølkebønder der oppe, so eg trur ikkje vi skal avskrive dei framover, meiner han.
Like fullt tykkjer Endre Råheim det er moro å vere på vinnarlaget denne gongen.
– At vi her i Sogn og Sunnfjord no hevdar oss i kampen mot nordfjordingane og sunnmøringane som har dominert so lenge, er jo kjekt.