Raset like vest for Tyinkrysset vart meldt like før klokka 16 søndag.
Filefjell har mange populære turområde, og det er mange hytter og leiligheiter i området.
Eit redningshelikopter gjekk over skredet, og Andreas Bull ved Hovudredningssentralen på Sola opplyste på eit tidleg tidsdpunkt at det var lite som tydde på at det var folk i skredet.
– Det er skispor i nærleiken, men ikkje i direkte tilknyting til skredet. Skispora går på oversida av skredet, men vi søkjer gjennom for å få verifisert at det ikkje er folk der, sa han.
Skredet var kring 10x100 meter, og så pass lite at redningshelikopteret hadde problem med å lokalisere det.
HRS vurderte også å kalle ut lavinehundar til å søke gjennom skredet.
– Men det viste seg at det allereie var hundar på øving, berre eit kvarter frå skredet. Dei var framme på kort tid, sa Bull.
I tillegg til lavinehundar og redningshelikopter, reiste luftambulanse, Røde Kors-mannskap og skredgruppe til staden.
– Skredet har gått i eit lett tilgjengeleg, men bratt område, 500-600 meters luftlinje frå Nystuen hotell, opplyste operasjonsleiar Marianne Brun ved Vestoppland politidistrikt.