Det viser ei runde som Firda har gjort i samband med at dei tre HAFS-kommunane Fjaler, Hyllestad og Askvoll har invitert andre kommunar med på ei utgreiing om kommunestruktur.
Klart positive er dei største, Flora og Førde kommunar.
– Eg er generelt positiv til alle former for samarbeid, det gjeld også kommunesamanslåing om dette skal bli aktuelt, seier ordførar i Førde, Olve Grotle (H), til avisa.
Vil gå breitt ut
Fjaler, Hyllestad og Askvoll har alle byrja på ei slik vurdering i samband med realiseringa av Dalsfjordbrua. No ynskjer dei seg ei oppdatert utgreiing av konsekvensar knytt til samanslåing.
Med på laget har dei invitert Balestrand, Bremanger, Flora, Førde, Naustdal, Gaular, Gulen, Høyanger, Jølster og Solund.
– Tanken med invitasjonen er at når vi først skal gjere dette, så vil vi gå breiast mogleg ut, seier Fjaler-ordførar Arve Helle (Ap) til Firda.
Laber interesse
I Solund trur ordførar Ole Gunnar Krakhellen (H) at lange reiseavstandar gjer det uaktuelt med kommunesamanslåing for deira del. Varaordførar i Høyanger, Solveig Løvik Norevik (Ap), meiner for sin del at kommunen har det bra åleine.
Flora-ordførar Bengt Solheim-Olsen seier til avisa at han ser potensial til samanslåing på alle kantar, men vedgår at invitasjonen kom brått på.
Verken i Naustdal, Bremanger eller Gulen ser ordførarane noko grunn til å vere med på utgreiinga, medan Balestrand-ordførar Harald Offerdal (Ap) er meir positiv.
– Det må vere noko å tene på, ein gevinst, om Gaular skal slå seg saman med nabokommunar, seier ordførar i Gaular, Mathias Råheim (H).