Grendeskulane får skulda for trong økonomi

Med utsikt over Dalsfjorden står Kari Heier Nistad og grev i eit blomsterbed. I 26 år var ho rektor ved barneskulen i Dale, no har ho sagt opp jobben i protest.

– Eg vil seie frå om at dette ikkje går lenger. Eg kan ikkje og vil ikkje vere ansvarleg for ein skule der ressursane er så knappe, seier ho til NRK.no.

– Mi plikt å seie frå

Oppseiinga er eitt av fleire teikn på trong kommuneøkonomi. Kommunen har slutta å brøyte private vegar, det er gjennomført store kutt ved skular og sjukeheim og ordføraren kutta store deler av løna si for å vise at ho tek situasjonen på alvor.

For Heier Nistad vart ressursane så knappe at ho ikkje følte ho kunne sikre ei forsvarleg drift.

– Det alvorlegaste er at vi ikkje klarer å fange opp og følgje opp elevar som har utfordringar. Vi greier ikkje å nå kompetansemåla læreplanen legg opp til, og då er det mi plikt å seie frå.

• Les også: Gjekk inn for å gå vidare med høyringsprosess
• Les også: Vil kjempe for å behalde skulen

Få elevar per skule

Fjaler-rådmann Ola Hovland stadfestar at økonomisituasjonen er krevjande.

– Men vi har ei god drift og vi leverer gode tenester, seier han og viser til fleire barometer der Fjaler ligg i landstoppen.

Hovland peikar ut grendeskulane som ein av grunnane til at kommunen slit økonomisk. I tillegg til barneskulen i Dale er det grendeskular i Flekke, Guddalen og Våge. Eksterne konsulentar har påpeika at det berre er fire kommunar i Norge som har færre elevar per skule enn Fjaler.

– At det er innsparingar ved å endre strukturen kjem ein ikkje vekk frå, seier rådmannen.

• Les også: Folket rår ho til å bli del av ein større kommune

Politikarane er delte

Gruppeleiar i Fjaler Høgre, Odd Helge Aase, trur nedlegging er tvingande nødvendig.

– Frå kommunegrensa til kommunegrense i Fjaler kan du køyre på ein time, og vi har fire skular. Det er eit politisk meisterstykke om vi får til dette utan å sjå på strukturar.

Flekke skule er blant grendeskulane som har vore truga av nedlegging fleire gonger. Kjetil Felde i Senterpartiet har trua på småskulane og går ikkje med på nedlegging av nokon av dei.

– Eg trur det er skilnaden på om folk vel å busetje seg i Flekke eller Dale. Har ein ikkje ein skule i nærleiken, der ungane slepp å reise med buss, så trur eg ikkje folk vel å busetje seg der.

Den nyleg avgåtte rektoren ved den største skulen i kommunen er derimot klar i talen.

– Fjaler kommune er ikkje stor nok til å ha så mange skular. Ein må prioritere, seier Heier Nistad.