Tradisjonen tru har politipatruljane på jobb i Sogn og Fjordane hatt nok å henge fingrane i natt til søndag.
Ved midnatt måtte politiet i Førde rykkje ut og ta hand om ein mann i slutten av tjueåra som laga trøbbel på ein privatfest. Han gjekk rett frå fest til arrest, og slepper ikkje ut før søndag føremiddag.
I Nordfjord fekk politiet to promillesaker å hanskast med, først rett før klokka 03. Ein utanlandsk sjåfør i 40-åra vart stansa, mistenkt for ruskøyring.
Ein time seinare måtte politiet krysse over fylkesgrensa til Møre og Vanylven. Ein 19-åring vart fråteken førarkortet etter mistanke om køyring i rusa tilstand.
På Årdalstangen måtte politiet ta hand om tryggleiken for fleire tusen festivaldeltakarar på Målrock som brått fekk festen avbroten av den sterke vinden frå uvêret "Lena".