– Dette skitrekket vil setje Sogndal på kartet som Noregs laussnø-destinasjon nummer ein. Enkelt og greitt. Eit nytt trekk vil løyse ut enormt store område der det vil vere mogeleg å drive skikøyring utanfor preparerte løyper, seier dagleg leiar i Sogndal skisenter, Per Odd Grevsnes, til NRK.
AMBISJONAR: Dagleg leiar i Sogndal skisenter, Per Odd Grevsnes.
Foto: Sigrid Skjerdal / NRKDet er ingenting å seie på ambisjonane til sogndølane. Nettavisa porten.no skriv i dag om planane om å byggje eit nytt skitrekk opp til Kambafjellet 1220 meter over havet. Sogndalsdalen og fjella rundt er alt landskjende for det sogningane sjølve påstår er den beste laussnøen i heile landet. For både bygdefolk, studentar og frikøyrar er dalen alt eit mekka. Blant anna er det spela inn spektakulære skifilmar i dalen.
Dalen har også fått sin eigen fjellsportfestival.
ELDORADO: Sogndalsdalen er blitt eit eldorado for frikøyrar frå heile landet.
Foto: Bård Basberg / SGN– Har ikkje råd til gondolheis no
No vil den daglege leiaren ta steget vidare.
– Vi har tidlegare hatt planar om å byggje ein gondolheis, og det kan kome seinare. Men i dag er vi nok ikkje store nok eller har god nok økonomi til å byggje ein slik heis dei næraste åra. Det kostar også mykje å drive gondol- eller stolheisar som skal frakte folk opp på fjellet. Då må vi ha mange folk på jobb, og det har vi ikkje råd til i dag. Difor satsar i første omgang på å byggje eit trekk med t-krok, forklarar Grevsnes.
Fri Flyt-redaktøren: – Kan bli det beste
Erlend Sande, redaktør for skibladet Fri Flyt, er sjølv ein svært erfaren og profilert frikøyrar. Han kjenner ikkje til planane anna enn det han har lese i avisa. Han understrekar at han difor ikkje kan seie noko om økonomi eller eventuelle konsekvensar for miljøet. Men som tilreisande skikøyrar helsar han planane velkomne.
FRIKØYRAR: Redaktør i Fri Flyt, Erlend Sande.
Foto: privat– Eit nytt trekk vil opne endå meir terreng for skikøyrarar i eit av dei beste områda vi har i Noreg.
Sande meiner at Grevsnes ikkje overdriv når han seier at det nye trekket vil gjere Sogndal til eit av landets fremste reisemål for frikøyrar.
– Ja, viss du legg saman terrenget og snømengdene som plar kome i Sogndalsdalen, er eg einig i at dette absolutt vert det beste i Noreg.
Eit stykke igjen
Grevsnes understrekar at planane er i ein tidleg fase, og at det er først no jobben med å overtyde styret og få tak i pengar startar. Men om alt går rette vegen, kan byggjestart alt bli til neste haust.
– Men då skal det vere få skjær i sjøen. Det er ganske mange prosessar som må vere på plass før vi kan setje spaden i jorda, seier Grevsnes.
