NRK Meny
Normal

– Det er god grunn for å flagge for Gaularfjellet

Klokka 15 i dag er ventetida endeleg over for Heidi Vallestad og Sigurd Årskaug. Når Gaularfjellet opnar, går også startskotet for sesongen ved Flatheim friluftsgard.

Flagget til topps

FLAGGA: Med opning av Gaularfjellet gjekk flagget til topps ved brøytestasjonen på Gaularfjellet.

Foto: Privat

– Det plar vere stor trafikk frå dag ein. Ein del utanlandske bilar har allereie hatt bomtur og måtte snu, så det skal bli veldig godt å få opna fjellet att, seier Sigurd Årskaug.

Femdobla førehandsbooking

I dag opnar både Sognefjellet og Gaularfjellet etter vinterstenging. Fjellovergangane vil den første tida likevel vere nattestengd frå klokka 20 til 08.

Mykje snø på Sognefjellet

OPNAR: Frå i ettermiddag kan bilane igjen køyre over Sognefjellet.

Foto: Webkamera

Mellom stengingane vil venteleg utkikspunktet Utsikten på Gaularfjellet lokke godt med reisande til den nasjonale turistvegen. Og godt med overnattingsgjester til Flatheim friluftsgard.

– I fjor hadde vi kring 600 gjestedøgn og gjester frå 39 nasjonar. Ut frå førehandsbestillingane ser det ut il å bli ein god sesong. Den er fem gonger så høg som på same tid i fjor, seier Årskaug.

Spesielt utlendingar

Heidi Vallestad og Sigurd Årskaug

ARKIVFOTO: Heidi Vallestad og Sigurd Årskaug driv Flatheim friluftsgard på Gaularfjellet.

Foto: Steinar Lote / NRK

– Utviklar sesongen seg slik som førehandsbestillingane, så må vi hive oss rundt å få gjort noko, humrar Årskaug til og siktar til overnattingskapasiteten. Friluftsgarden har fem-seks romeiningar.

Opninga av Utsikten gav reiselivsaktørane rundt Gaularfjellet ein veldig auke i turistbesøk .

Utsikten ved Gaularfjellet

POPULÆR: Utkikspunktet på Gaularfjellet er lagt merke til i utlandet.

Foto: Jiri Havran / Jiri Havran

– Utsikten er veldig «hot» i utlandet. I fjor hadde vi mest norske gjester. I år har vi i tillegg veldig mykje utlendingar. Like etter Grüne Woche i vinter fekk vi fleire bestillingar frå Tyskland, seier Årskaug.

Ventar stor trafikk

Vaktoperatør Jan Erikstad ved Vegtrafikksentralen i Lærdal seier at han siste vekene har fått telefonar med spørsmål om opning av nettopp Gaularfjellet og Sognefjellet.

– Hatt del spørsmål alt frå før påske frå folk som ville over eller opp i snøen på Sognefjellet. Vi har også fått telefonar frå dei som vil opp på Gaularfjellet, seier han.

– Ut frå førespurnaden siste vekene så vil det bli ein del trafikk over desse fjellovergangane, avsluttar Erikstad.

Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.