Det er nokre av elementa i tilrådinga til Regional transportplan for Sogn og Fjordane 2018–2027, som fylkesrådmann Tore Eriksen la fram fredag.
Innan drift er det tunnelvedlikehald som står øvst på prioriteringslista. Deretter kjem å redusere forfall og å drifte fylkesvegnettet på dagens nivå.
Innan kollektivtrafikken er førsteprioritet å vidareføre eit heilskapleg rutesystem, og på investeringssida står gjennomføring av bundne prosjekt øvst på lista, så skredsikring og mindre investeringar.
Kyststamvegen
Fylkesrådmann rår politikarane til å følgje tilrådinga frå Statens vegvesen når det gjeld kvar kystvegen skal gå gjennom Sogn og Fjordane.
Det betyr at Florø og Vågsøy ikkje får viljen sin med å velje det ytre alternativet med veg over Terøya, dersom fylkespolitikarane gjer som rådmannen rår til.
Med den løysinga vert ferjesambanda Rutledal–Rysjedalsvika og Stårheim–Isane sikra.
Investeringar fram til 2021
Fylkesrådmannen rår til at det blir oppstart av følgjande byggeprosjekt på fylkesvegnettet før 2021:
- Fv. 698 Blaksettunnelen
- Fv. 303 Seimsdalstunnelen
- Fv. 618 Barmen–Barmsund (ferjekai)
- Fv. 611 Sæle–Engebø
Han legg også opp til å prioritere følgjande gang- og sykkelvegprosjekt:
- Enkle fysiske tiltak i dei største sentrumsområda
- Fv. 614 Breivika–Svelgen (Bremanger)
- Fv. 607 Heggebø–Leirvik (Hyllestad)
- Fv. 548 Brandsøy–Solheim (delprosjekt)
I tillegg rår fylkesrådmannen til mindre investeringstiltak innan småutbetringar, trafikktryggingstiltak, planlegging, prosjektering og kollektivtrafikk.
Skredsikring
Fylkesrådmannen rår fylkestinget til å prioritere følgjande skredsikringsprosjekt:
- Fv. 633 Kleiva, tunnel
- Fv. 722 Flovegen
- Fv. 53 Ljoteli, Årdal
- Fv. 50 Vassbygdvatnet, Aurland
- Fv. 630 Galdane i Borgund
- Fv. 57 Strand i Fjaler
Fylkesrådmannen har også vurdert ferjeavløysingsprosjekta Atløysambandet i Askvoll og Ytre Steinsund i Solund.
Han meiner ferjeavløysingsordninga vil krevje ei eigenfinansiering som er høg dei første åra, for så å gradvis bli redusert etter som «prosjektlånet» vert nedbetalt. Han meiner det vil vere utfordrande å finansiere alle ferjeavløysingsprosjekt i mange år etter byggestart.
Fylkesrådmannen varslar også at fylkeskommunen har eit mål om å klimatilpasse veginfrastrukturen til eit endra klima i åra frametter.
Fylkespolitikarane skal gjere endeleg vedtak i fylkestinget i desember.