Hopp til innhold

Presenterte høgdepunkta - slik blir teateråret

Sogn og Fjordane teater lokkar med både musikal, komedie og talkshow i 2014 – sentralt står grunnlovsjubileet for Norge.

Roger Hilleren, Fredrik Steen og Terje Lyngstad

SATIRE: Skodespelarane Roger Hilleren og Fredrik Steen skal ijgen stå på scena når Skilte menn rir igjen skal visast neste år. Teatersjef Terje Lyngstad (t.h) presenterte i dag teaterprogrammet for 2014.

Foto: Britt Kristin Ese / NRK

Terje Lyngstad

VISER SEKS TEATERSTYKKE: Teatersjef Terje Lyngstad presenterte i dag teateråret 2014.

Foto: Britt Kristin Ese
Edvard Hoem

VAR SKEPTISK: Forfattar Edvard Hoem var først skeptisk til at boka skulle bli musikal.

Foto: Britt Kristin Ese / NRK

Teatersjef Terje Lyngstad presenterte i dag teateråret 2014.

– Vi skal vise publikum eit mangfald og har store satsingar mot at vi feirar grunnlovsjubileet, seier han.

I 2014 er det 200 år sidan vi fekk eiga grunnlov og i samband med det har Sogn og Fjordane teater to nyskrivne stykke. Den eine er det satiriske talkshow-komedien «Norge.Nett.No» av Tommy Sørbø og musikalen «Kjærleikens ferjereiser» av Edvard Hoem.

– Populært sagt kan vi seie at tema for 2014 er Alt for Norge. I og med at vi har grunnlovsjubileet, ønskjer vi å sjå kva som har skjedd i Norge, seier han.

Stor satsing på musikal

Den aller største satsinga til teateret neste år er «Kjærleikens ferjereiser» som blir presentert som ein musikal. Ni skodespelarar og fire musikarar står på scena og bak står eit stort kunstnerisk team.

Framsyninga kostar 4,5 millionar, noko som er om lag ein million meir enn ei vanleg oppsetjing.

– Kjærleikens ferjereiser er viktig nynorsk historie som kom på ei sentral tid for den norske utviklinga, midt i EF-striden og på den tida vi fann oljen. Det å setje dette stykket opp, er ei markering av det norske og vestnorske. Den aller første setninga i romanen er nettopp «Dette er Norge», seier Lyngstad.

(Artikkelen held fram under videoen)

Sogn og Fjordane teater viste i dag fram teaterprogrammet for 2014. Mellom framsyningane er kabareten Ivar Medaas – dar kjem dampen. Her er eit utdrag. Foto: Britt Kristin Ese, NRK

SJÅ VIDEO: Sogn og Fjordane teater viste i dag fram teaterprogrammet for 2014. Mellom framsyningane er kabareten Ivar Medaas – dar kjem dampen. Her er eit utdrag. Foto: Britt Kristin Ese, NRK

Skeptisk forfattar

Forfattar Edvard Hoem var først skeptisk til boka skulle bli musikal. Den var veldig berømt i si tid og forfattaren var ikkje heilt med på tanken om å setje den opp på scena no. Bortsett frå ei talerolle, blir all teksten sunge.

– Skal dei berre bruke boktittelen til å lage noko heilt anna, tenkte eg. Men folk rundt meg greip inn og sa at eg var tullete som ikkje ville. Boka vil bli dregen fram igjen og det er positivt, seier Hoem.

Teatersjef Terje Lyngstad gler seg til å sjå resultatet på scena til hausten.

– Vi har jobba veldig mykje med «Kjærleikens ferjereiser». Vi har eit stort team med oss og Henning Sommerro har skrive heilt ny musikk. Stykket skal også visast i Hordaland, slik at det får eit lengre liv. Alt i alt er det ein stor produksjon, seier Lyngstad.

Skråblikk på dagens samfunn

I den satiriske talkshow-komedien« Norge.Nett.no» er spørsmålet om vi har blitt verdas beste land å bu i, og er det typisk norsk å vere god? Her møter vi både ein sexy historikar, medierådgjevarar frå First House, Dag Solstad og Petter Stordalen. Til og med Vidkun Quisling dukkar opp frå det hinsidige for å gi eit skråblikk på dagens Norge.

– Vi har gått frå å vere ein nasjon som ikkje var mellom dei rikaste, til å bli nettopp det. Det er det satiren handlar om, seier Lyngstad.

Vil gjenta suksessen med skilte menn

Sogn og Fjordane teater skal som vanleg setje opp Kinnaspelet i juni. I tillegg skal dei vise barneteateret «Heksestrekar» og «Dar kjem dampen» av Ivar Medaas.

Teateret vil prøve å gjenta suksessen dei hadde med «To skilte menn» i 2008. Komikar Fredrik Steen, kjent som Hildegunn Moltubakk, skal igjen stå på scena med skodespelar Roger Hilleren i oppfølgjaren «Skilte menn rir igjen».

Færre spelestader neste år

I år var stykket om løparkongen Mensen Ernst ein av dei store satsingane. Besøkstalet var varierande alt etter kvar det blei sett opp på den omfattande turneen. Teatersjef Terje Lyngstad seier dei generelt har vore nøgde med besøkstala dei to siste åra, men at dei likevel skal ta nokre grep i 2014.

– No skal vi gå gjennom spelestadane våre. Vi ser på dei arrangørane vi har og på vår eigen jobb på turnestadane. Vi kjem ikkje til å ha like omfattande turne som før, men vere meir selektive, seier han.

Dette kan du sjå ved Sogn og Fjordane teater i 2014:

  • Norge.nett.no – talkshow i beste Skavlan-stil- blir spelt i februar/mars
  • Ivar Medaas – dar kjem dampen – kabaret – blir spelt februar/mars
  • Heksestrekar – barneteater – blir spelt i mars
  • Kinnespelet – songen ved det store djup – 30-årsjubileum for det tradisjonsrike spelet på Kinn – blir spelt i juni
  • Kjærleikens ferjereiser – musikal – blir spelt i september/oktober
  • Skilte menn rir igjen – oppfølgaren til To skilte menn – blir spelt i november/desember